నెల వ్యవధిలోనే నాలుగుసార్లు బాదిన హెచ్‌డీఎఫ్‌సీ

హెచ్‌డీఎఫ్‌సీ బ్యాంకు  తన రుణగ్రహితలకు  చుక్కలు చూపుతోంది. ఆ బ్యాంకు నెల వ్యవధిలోనే నాలుగు సార్లు కస్టమర్లకు గృహ రుణాల వడ్డీ రేట్లను పెంచింది. ఇంటి రుణాలపై తన రిటైల్ ప్రైమ్ లెండింగ్ రేటు(ఆర్‌పీఎల్ఆర్)ను పెంచుతున్నట్టు గురువారం ప్రకటించింది. కొత్త రేట్లు నేటి నుంచి అమల్లోకి వస్తున్నట్టు హెచ్‌డీఎఫ్‌సీ బ్యాంకు ప్రకటించింది. కొత్తగా పెంచిన రేట్లతో హెచ్‌డీఎఫ్‌పీ హోమ్ లోన్ వడ్డీ రేట్లు 7.55 శాతం నుంచి ప్రారంభమవుతున్నాయి. ‘‘హెచ్‌డీఎఫ్‌సీ గృహ రుణాలపై రిటైల్ ప్రైమ్ లెండింగ్ రేటు(ఆర్‌పీఎల్ఆర్)ను 50 బేసిస్ పాయింట్లు పెంచింది. జూన్ 10, 2022 నుంచి ఈ పెంచిన వడ్డీ రేట్లు అమల్లోకి వస్తున్నాయి’’ అని హెచ్‌డీఎఫ్‌సీ తెలిపింది.

మే నెల నుంచి హెచ్‌డీఎఫ్‌సీ హోమ్ లోన్ వడ్డీ రేట్లను పెంచుతూనే ఉంది. మే 2న ఈ రేటును 5 బేసిస్ పాయింట్లు పెంచగా.. మే 9న మరో 30 బేసిస్ పాయింట్లు పెంచింది. జూన్ 1న కూడా 5 బేసిస్ పాయింట్ల మేర ఈ రేటు పెరిగింది. తాజాగా నాలుగో సారి 50 బేసిస్ పాయింట్ల మేర వడ్డీ రేట్లు పెరిగాయి. మొత్తంగా నెల వ్యవధిలోనే 90 బేసిస్ పాయింట్ల మేర హెచ్‌డీఎఫ్‌సీ హోమ్ లోన్ లెండింగ్ రేట్లు పెరిగాయి.

స్పెషల్ హౌసింగ్ లోన్ స్కీమ్ కింద క్రెడిట్ స్కోర్ 800కి పైగా ఉన్న వారికి 7.55 శాతం వడ్డీ రేటు వర్తిస్తుంది. రుణ గ్రహీతలు రూ.30 లక్షల వరకు ఉన్న రుణానికి కనీసం 7.70 శాతం వడ్డీ రేటును చెల్లించాల్సి ఉంటుంది. రూ.30 లక్షల నుంచి రూ.75 లక్షల వరకు రుణం ఉంటే 7.95 శాతం, రూ.75 లక్షల పైన లోన్ ఉన్న వారు 8.05 శాతం వడ్డీలను చెల్లించాలి. అయితే ఈ లోన్లపై మహిళలకైతే 0.05 శాతం డిస్కౌంట్ లభిస్తుంది. మీ సిబిల్ స్కోరును బట్టి మీ రిస్క్ ప్రీమియం ఆధారపడి ఉంటుంది. రుణ గ్రహీతలు తమ లోన్లపై రీసెట్ డేట్ నాడు ఎక్కువ వడ్డీలను చెల్లించాల్సి ఉంటుంది. ఒకవేళ మీరు హెచ్‌డీఎఫ్‌సీ హోమ్ లోన్ తీసుకుని ఉంటే.. తాజా రేటు పెంపుతో మీ ఈఎంఐ కూడా పెరుగుతుంది.