టాటా మోటార్స్ వాహనాలపై భారీ తగ్గింపు ఆఫర్...కానీ వాటికి మాత్రమే

వ్యాపారం అన్నాక అనేక వ్యూహాలుండాలి మరి. టాటా మోటార్స్ అదే చేసింది. తాజాగా టాటా మోటార్స్ ఎంపిక చేసిన మోడల్స్, వేరియంట్లపై భారీ డిస్కౌంట్లను ఆఫర్ చేస్తోంది. జూన్ నెలలో ఈ డిస్కౌంట్లు అందుబాటులో ఉంటాయని కంపెనీ చెప్పింది. తన అన్ని కారు బ్రాండ్లపై ధరలు పెంచుతోన్న నేపథ్యంలో కంపెనీ ఈ నెలలో రూ.45 వేల వరకు డిస్కౌంట్లను అందుబాటులోకి తెచ్చింది. టాటా మోటార్స్ ఆఫర్ చేసే డిస్కౌంట్ కార్లలో టియాగో, టిగోర్, నెక్సాన్, హారియర్, సఫారిలున్నాయి.

టాటా మోటార్స్ దేశంలో రెండో అతిపెద్ద కార్ల కంపెనీలలో ఒకటి. ఈ కంపెనీ ఇటీవలే టిగోర్, టిగోర్ ఐసీఎన్‌జీ మోడల్స్‌తో సీఎన్‌జీ సెగ్మెంట్‌లోకి ప్రవేశించింది. టాటా హారియర్ కారుపై కంపెనీ అత్యధిక డిస్కౌంట్‌ను ఆఫర్ చేస్తోంది. ఈ కారుపై రూ.45 వేల మేర డిస్కౌంట్‌ను అందిస్తోంది. ఈ డిస్కౌంట్ ఆఫర్‌లో రూ.5 వేల కార్పొరేట్ డిస్కౌంట్, మిగిలినవి ఎక్స్చేంజ్ బోనస్‌లున్నాయి. ఆ తర్వాత సఫారి కారుపై టాటా మోటార్స్ ఎక్కువ డిస్కౌంట్‌ను ఆఫర్ చేస్తోంది. ఈ ఎస్‌యూవీపై రూ.40 వేల వరకు డిస్కౌంట్ అందుబాటులో ఉంది. ఈ డిస్కౌంట్‌లో ఎక్స్చేంజ్ బోనస్ కూడా కలిసి ఉంది.

భారత్‌లో అత్యంత ఎక్కువగా అమ్ముడుపోతున్న ఎస్‌యూవీలలో నెక్సాస్ సబ్‌-కాంపాక్ట్ ఎస్‌యూవీ ఒకటి. దీనిపై కేవలం రూ.5 వేల డిస్కౌంట్‌నే అందుబాటులో ఉంది. అయితే టాటా మోటార్స్ కంపెనీ తన ఎలక్ట్రిక్ వెహికిల్స్, సీఎన్‌జీ వాహనాలపై ఎలాంటి డిస్కౌంట్లను ఆఫర్ చేయడం లేదు. టాటా మోటార్స్ ప్రస్తుతం దేశంలో అతిపెద్ద ఎలక్ట్రిక్ వెహికిల్ తయారీదారులలో ఒకటిగా ఉంది. నెక్సాన్ ఈవీ, నెక్సాన్ ఈవీ మ్యాక్స్, టిగోర్ ఈవీలపై కంపెనీ ఎలాంటి డిస్కౌంట్లను ఆఫర్ చేయడం లేదు.

ఇతర మోడల్స్ డిస్కౌంట్లను తీసుకుంటే.. టియాగో హ్యాచ్‌బ్యాక్, టిగోర్ సబ్-కాంపాక్ట్ సెడాన్‌లపై రూ.23 వేల డిస్కౌంట్ ఆఫర్‌ను కంపెనీ అందుబాటులోకి తెచ్చింది. ఈ డిస్కౌంట్ ఆఫర్లలో క్యాష్ డిస్కౌంట్‌తో పాటు రూ.10 వేల చొప్పున ఎక్స్చేంజ్ బోనస్‌ కలిసి ఉన్నాయి. కార్పొరేట్ డిస్కౌంట్ రూపంలో అదనంగా రూ.3 వేల డిస్కౌంట్ లభిస్తుంది.