ఒకవేళ ఫ్లైఓవర్ల నిర్మాణం ఆగిపోతే మాత్రం తీవ్ర పరిణామాలు

కృష్ణా జిల్లా గుడివాడలో జరుగుతున్న అభివృద్ధిని దివంగత ఎన్టీ రామారావు కుమార్తె, భారతీయ జనతా పార్టీ జాతీయ ప్రధాన కార్యదర్శి హోదాలో ఉన్న దగ్గుబాటి పురంధేశ్వరి అడ్డుకుంటున్నారని స్థానిక వైఎస్సార్ కాంగ్రెస్ పార్టీ ఎమ్మెల్యే, మాజీ మంత్రి కొడాలి నాని ఆరోపించారు. అన్న దివంగత ఎన్టీఆర్ రెండు సార్లు ప్రాతినిథ్యం వహించిన గుడివాడలో జరుగుతున్న అభివృద్ధిని అడ్డుకోవద్దని విజ్ఞప్తి చేశారు. ఈ విషయమై దగ్గుబాటి పురంధేశ్వరితో మాట్లాడటానికి తాను రెండు సార్లు ప్రయత్నించారని కొడాలి నాని చెప్పారు. అయితే, ఆమె తనకు అందుబాటులోకి రాలేదని తెలిపారు. దీంతో మీడియా ముఖంగా ఫ్లైఓవర్ల నిర్మాణాన్ని అడ్డుకోవద్దని దగ్గుబాటి పురంధేశ్వరికి విజ్ఞప్తి చేస్తున్నానన్నారు. ఒకవేళ ఈ ఫ్లైఓవర్ల నిర్మాణం ఆగిపోతే మాత్రం తీవ్ర పరిణామాలు ఎదుర్కోవాల్సి ఉంటుందని తీవ్ర హెచ్చరికలు జారీ చేశారు. గుడివాడ మీదుగా వెళ్లే రైళ్లను అడ్డుకుంటామని.. ఇక్కడే టెంట్ వేసి కేంద్ర ప్రభుత్వం దిగొచ్చేలా చేస్తామని కొడాలి నాని హెచ్చరించారు. ఈ మేరకు గుడివాడ పురపాలక సంఘం కార్యాలయంలో సోమవారం కొడాలి నాని మీడియాతో మాట్లాడారు.

ముఖ్యమంత్రి వైఎస్ జగన్మోహన్‌రెడ్డి, ఎంపీ వల్లభనేని బాలశౌరిల కృషితో గుడివాడ ప్రజల సుదీర్ఘ సమస్య అయిన రైల్వే గేట్లపై ఫ్లైఓవర్లు మంజూరయ్యాయని కొడాలి నాని చెప్పారు. ఈ ఫ్లైఓవర్ల నిర్మాణానికి ఇటీవలే కేంద్ర మంత్రి నితిన్ గడ్కరీ కూడా శంకుస్థాపన కూడా చేశారన్నారు. అయితే, కేవలం 10 మంది వ్యాపారుల ప్రయోజనాల కోసం లక్షలాది మందికి ఉపయోగపడే ఫ్లైఓవర్ల నిర్మాణాన్ని అడ్డుకునేందుకు దగ్గుబాటి పురంధేశ్వరి ప్రయత్నిస్తున్నారని ఆరోపించారు. ఈ ఫ్లైఓవర్ల నిర్మాణాన్ని అడ్డుకునేందుకు కేంద్ర మంత్రి నితిన్ గడ్కరీ వద్ద పురంధేశ్వరి అపాయింట్మెంట్ తీసుకున్నారని పేర్కొన్నారు.  రెండు సార్లు ఎంపీగా, కేంద్ర మంత్రిగా పని చేసిన దగ్గుబాటి పురంధేశ్వరి ఇలాంటి పిచ్చి ప్రయత్నాలు మానుకోవాలని కొడాలి నాని వ్యాఖ్యానించారు. దగ్గుబాటి పురంధేశ్వరి ఇప్పటికైనా ఈ పిచ్చి ప్రయత్నాలు మానుకోవాలన్నారు.