ఏడు రాష్ట్రాల్లో అగ్గిరాజేసిన...అగ్నిపథ్

త్రివిధ దళాల్లో సైనిక నియామకాల కోసం కేంద్రం తీసుకొచ్చిన అగ్నిపథ్ పథకంపై పెద్ద ఎత్తున యువత ఆందోళనలు చేస్తోంది. ఏడు రాష్ట్రాల్లో ఆందోళనలు చేస్తూ పలు చోట్ల హింసాత్మక ఘటనలకు పాల్పడ్డారు. కొత్త మిలిటరీ రిక్రూట్‌మెంట్ పాలసీ అగ్నిపథ్‌పై పలు రాష్ట్రాల్లో కోపోద్రిక్తులైన యువకులు రైళ్లకు నిప్పు పెట్టడం, పోలీసులతో ఘర్షణ పడ్డారు. ఈ ఘటనల్లో కనీసం ఒకరు మరణించారు. పలువురు గాయపడ్డారు. ఇదిలావుంటే కేంద్ర ప్రభుత్వం ఈ పథకాన్ని సమర్థిస్తూ.. దీన్ని "పరివర్తన" అని పేర్కొంది.

బీహార్‌లో కొత్త రిక్రూట్‌మెంట్ స్కీమ్‌కు వ్యతిరేకంగా నిప్పులు చెరుగుతున్న నిరసనల మధ్య పశ్చిమ చంపారన్ జిల్లాలోని బెట్టియాలో ఉప ముఖ్యమంత్రి రేణు దేవి ఇంటిపై దాడి జరిగింది."ఇలాంటి హింస సమాజానికి చాలా ప్రమాదకరం. ఇది సమాజానికి నష్టమని నిరసనకారులు గుర్తుంచుకోవాలి" అని ప్రస్తుతం పాట్నాలో ఉన్న దేవి అన్నారు. బీహార్‌లో బుధవారం మొదలైన హింసాత్మక ఘటనలు అతలాకుతలం చేస్తున్నాయి. ఇప్పటికే ఆందోళనకారులు పలు రైళ్లకు నిప్పుపెట్టారు. రైల్వే స్టేషన్లో విధ్వంసానికి పాల్పడ్డారు.

ఉత్తరప్రదేశ్‌లోని బల్లియాలోని రైల్వే స్టేషన్‌లోకి ఈ ఉదయం ఒక గుంపు ప్రవేశించి రైలు కోచ్‌కు నిప్పు పెట్టింది. వారిని చెదరగొట్టడానికి పోలీసులు టియర్ గ్యాస్ ఉపయోగించే ముందు రైల్వే స్టేషన్ ఆస్తులను కూడా ధ్వంసం చేశారు. తూర్పు యూపీ జిల్లాలోని రైల్వే స్టేషన్ వెలుపల వీధుల్లో కర్రలు చేతపట్టుకున్న మరో వర్గం నిరసనకారులు పోలీసులతో వాగ్వాదానికి దిగారు. రైల్వే తెలిపిన వివరాల ప్రకారం.. బుధవారం నాడు నిరసనలు చెలరేగినప్పటి నుంచి 200 రైళ్లు ప్రభావితమయ్యాయి. 35 రైళ్లు రద్దు చేయబడ్డాయి. 13 షార్ట్-టర్మినేట్ చేయబడ్డాయి.