విలాసానికి నిలయం..ఆ లగ్జరీ కార్డీలియా క్రూయిజ్ షిప్

మనం కోరుకొనే విలాసాలన్నీ ఒకే చోటు దొరికితే ఇంకే కావాలి. అలాంటి వినోదాలకు...విలాసానికి నెలవు లగ్జరీ కార్డీలియా క్రూయిజ్ షిప్ అని చెప్పవచ్చు. ఇదిలావుంటే సముద్ర విహారానికి వెళ్లాలని అనుకునే వారికి శుభవార్త. లగ్జరీ కార్డీలియా క్రూయిజ్ షిప్ గత బుధవారం ఉదయం విశాఖపట్నం పోర్టుకు చేరుకుంది. చెన్నై నుంచి వచ్చిన ఈ షిప్‌లో 1900 మందికిపైగా పర్యాటకులు వైజాగ్ చేరుకున్నారు. ఈ క్రూయిజ్.. విశాఖపట్నం, పుదుచ్చేరి, చెన్నై వరకు వెళ్లి.. తిరిగి వైజాగ్ చేరుకుంటుంది.. కార్డీలియా క్రూయిజ్ కంపెనీ నడిపే ఈ షిప్.. సముద్రంలో తేలియాడే స్టార్ హోటల్‌ను తలపిస్తుంది.

చెన్నై నుంచి విశాఖ చేరుకున్న కార్డీలియా క్రూయిజ్.. మూడు రాత్రులతో నాలుగు రోజుల టూర్ ప్యాకేజీని ఆఫర్ చేస్తోంది. 2000 మంది ప్రయాణించే వీలున్న ఈ షిప్.. 36 గంటల్లో విశాఖ నుంచి చెన్నై చేరుకుంటుంది. ఈ క్రూయిజ్ టికెట్లు హాట్ కేకుల్లా అమ్ముడవడాన్ని బట్టి దీనికున్న డిమాండ్‌ను అర్థం చేసుకోవచ్చు.

కార్డీలియా క్రూయిజ్‌లో 11 అంతస్థులు ఉంటాయి. ఇందులో విలాసవంతమైన సౌకర్యాలు కల్పిస్తారు. ఇంజిన్, కార్గో తర్వాత మూడో ఫ్లోర్‌లో పాసింజర్ లాంజ్ మొదలవుతుంది. అక్కడి నుంచి ఎలివేటర్ ద్వారా పదో అంతస్థుకు చేరుకోవచ్చు. పదో ఫ్లోర్‌లో డెక్ లాంటి పెద్ద టెర్రస్ ఉంటుంది. పదకొండో అంతస్థులో ఉండే ప్రత్యేక సెటప్ ద్వారా సూర్యోదయం, సూర్యాస్తమయాలను వీక్షించడం మధురానుభూతిని కలిగిస్తుంది.

పిల్లలు ఆడుకోవడం కోసం ఈ షిప్‌లో కార్డీలియా కిడ్స్ అకాడమీ పేరిట విశాల ప్రాంగణాన్ని ఏర్పాటు చేశారు. జిమ్, స్వి్మ్మింగ్ పూల్, కేసినో, కామెడీ షోల కోసం ఆడిటోరియం, కొత్త సినిమాలను చూడటం కోసం థియేటర్లు, 24 గంటల సూపర్ మార్కెట్ ఉండటం ఈ షిప్ ప్రత్యేకత. జూన్ ఆరో తేదీన చెన్నై నుంచి బయల్దేరిన ఈ క్రూయిజ్ షిప్.. విశాఖ నుంచి జూన్ 8వ తేదీ రాత్రి బయల్దేరి జూన్ పదో తేదీ ఉదయం ఏడు గంటలకు పుదుచ్చేరి చేరుకుంటుంది. ఈ షిప్ కారణంగా పర్యాటక ఆదాయం పెరుగుతుందని ప్రభుత్వాలు భావిస్తున్నాయి.

కార్డీలియా షిప్‌ను వివాదాలు సైతం వెంటాడుతున్నాయి. 2021 అక్టోబర్‌లో ముంబై తీరంలో ఎన్‌సీబీ అధికారులు కార్డీలియా షిప్‌లో ఆకస్మికంగా డ్రగ్ రైడ్ నిర్వహించారు. షారుక్ ఖాన్ తనయుడు ఆర్యన్ ఖాన్ సహా 14 మందిని అరెస్ట్ చేశారు. ఈ షిప్‌లో డ్రగ్స్‌ను ఎట్టి పరిస్థితుల్లోనూ ఉండకుండా చర్యలు తీసుకోవడంతోపాటు.. కాసినో పట్ల ప్రయాణికులు ఆకర్షితులు కాకుండా చర్యలు తీసుకుంటామని లిఖిత పూర్వక హామీ ఇవ్వాలని పుదుచ్చేరి ప్రభుత్వం షిప్ యాజమాన్యాన్ని ఆదేశించింది. కాసినో లేకుంటేనే ఈ షిప్‌కు అనుమతులు ఇవ్వాలని అన్నాడీఎంకే కార్యదర్శి ఎ.అన్బఝగన్ తమిళనాడు ప్రభుత్వాన్ని కోరారు.