నాటి అత్యంత దారుణమైన ఆర్థిక సంక్షోభం నేడు కనిపిస్తోంది

ఇక దేశంలో తగినంత ఇంధనం లేకపోవడంతో ప్రజా రవాణ వ్యవస్థ కేవలం 50 శాతం మాత్రమే పనిచేస్తుందని అధికారులు తెలిపారు. 1948లో స్వాతంత్రం వచ్చిన అనంతరం ఇప్పుడు అత్యంత దారుణమైన ఆర్థిక సంక్షోభాన్ని శ్రీలంక ఎదుర్కోంటోందని ఆర్థిక నిపుణులు అంటున్నారు. ఎప్పుడు అక్కడ పరిస్థితులు అదుపులోకి వస్తాయో తేల్చి చెప్పలేకపోతున్నారు.

శ్రీలంకలో ఆర్థిక సంక్షోభం కొనసాగుతూనే ఉంది. కనీస అవసరాలు కూడా తీరక అక్కడ జనం అల్లాడుతున్నారు. ఏ వస్తువులు, సరుకులు ఓ పట్టాన దొరకడం లేదు. దీంతో పప్పు దగ్గర నుంచి పెట్రోల్ వరకు గంటల తరబడి నిరీక్షణ తప్పడం లేదు. అలా పెట్రోల్‌ కోసం ఓ వ్యక్తి క్యూలైన్‌లో నిలబడి అలాగే ప్రాణాలు విడిచాడు. రాజధాని కొలంబో శివారు పానదురాలో ఈ విషాద ఘటన చోటుచేసుకుంది.

అక్కడ గురువారం పెట్రోల్ బంకు దగ్గర ఇంధనం కోసం 53 ఏళ్ల ఆటో రిక్షా డ్రైవర్ క్యూలో వేచి ఉండగా గుండెపోటుతో మరణించాడు. డీజిల్ కోసం ఎదురు చూస్తూ ఆటోలోనే ఉన్న డ్రైవర్ తన వాహనంలోనే గుండె పోటుతో మరణించాడని అధికారులు తెలిపారు. అయితే శ్రీలంకలో గత కొంతకాలంగా ఇంధన కొరత నెలకొంది. దాంతో పెట్రోల్ బంక్‌ల దగ్గర పెట్రోల్, డీజిల్ కోసం పొడవైన క్యూలు ఉంటున్నాయి. గంటల తరబడి వేచి ఉండాల్సి వస్తుంది. కొన్ని సందర్భాల్లో వాహనదారులు తమ వాహనాలను ఫిల్లింగ్ స్టేషన్ల దగ్గర వదిలేస్తున్నారు.

ఈ క్రమంలో ఆ ఆటోడ్రైవర్ జూన్ 15వ తేదీ నుంచి ఇంధనం కోసం లైన్‌లో వేచి ఉంటూ తన వాహనంలోనే గుండెపోటుతో మరణించాడని అక్కడి అధికారులు తెలిపారు. అయితే శ్రీలంకలో ఇంధనల కోసం లైన్‌లో నిలబడి చనిపోవడం ఇదే మొదటిసారి కాదు. 2022 సంవత్సరం ప్రారంభం నుంచి ఇలాంటి సంఘటనలు చోటుచేసుకుంటున్నాయి. కొన్ని రోజుల క్రితం పుగోడ అనే ప్రాంతంలో వంటగ్యాస్‌ కోసం క్యూలైన్‌లో నిలబడి బుధవారం 64 ఏళ్ల వృద్ధుడు మరణించాడు. కాగా శ్రీలంక అత్యంత దారుణమైన పరిస్థితులు ఇంకా కొనసాగుతూనే ఉన్నాయి. అక్కడ తినడానికి తిండి దొరకని దుస్థితి ఉంది. దాంతో కొన్ని రోజుల క్రితం అక్కడ ఆందోళనలు జరిగాయి. చాలామంది రోడ్డెక్కి నిరసనలు తెలిపారు.