ఒక్క దెబ్బకు రెండు పిట్టలన్న ఆలోచనతో...పీతల విస్కీ పుట్టుకోచ్చింది

మనం పండ్లతో కూడిన విస్కీ, బ్రాందీ గురించి వినివుంటాం. కానీ పీతల విస్కీ గురించి వినివుంటామా. అస్సలు వినివుండం. అయితే ఇప్పుడు అమెరికాకు వెళ్లితే ఆ పేరు వినకతప్పదు. అమెరికా... న్యూ హ్యాంప్‌షైర్‌లోని టామ్‌వర్త్ డిస్టిల్లింగ్ డిస్టిల్లరీ... ముదురు ఆకుపచ్చ రంగులో ఉండే పీతల తో విస్కీ తయారుచేస్తోంది. ఆల్రెడీ ఈ ప్రొడక్టును లాంచ్ చేసింది కూడా. ఈ పీతలు ప్రపంచమంతా ఉన్నాయి. వీటిని ఒక్కో చోట ఒక్కో పేరుతో పిలుస్తారు. యూరప్ దేశాల్లో వీటిని పచ్చని తీరప్రాంత పీతలు. ఈ పీతలు... యూరప్ దేశాల నుంచి అమెరికాకు దండయాత్రగా వచ్చాయని అంటారు. అందుకే అమెరికన్లు వీటిని యూరోపియన్ గ్రీన్ క్రాబ్ అని పిలుస్తారు. మరి వీటితో విస్కీ ఎలా తయారవుతుంది?

ఈ పీతల విస్కీని హౌస్ ఆఫ్ టామ్‌వర్త్ క్రాబ్ ట్రాప్పెర్ అని పిలుస్తున్నారు. ఈ విస్కీని బార్బన్ బేస్‌తో తయారుచేస్తున్నారు. ఈ బార్బన్ బేస్‌ని పీతలు, పాప్‌కార్న్, మసాలా మిశ్రమంతో తయారుచేస్తున్నారు. దీనిపై మనకు అర్థమయ్యే భాషలో కొంత వివరణ ఇచ్చారు డిస్టిల్లరీ ఓనర్ స్టీవెన్ గ్రాస్సే. ఏమన్నారంటే... 40 కేజీల చిన్న పీతలను క్రాబ్ స్టాక్ అనే యంత్రంలో వేసి ఉడికించారట. తర్వాత వాటికి న్యూట్రల్ ఆల్కహాల్‌ కలిపి.. రోటరీ వాక్యూమ్‌లో వేసి.. గిరగిరా తిప్పారట. ఇలా చేసినప్పుడు.. పీతలు పేస్టులా అయిపోతాయి. వాటి నుంచి రసం వస్తుంది. దాన్నే విస్కీగా తయారుచేస్తున్నారు. మరి ఈ విస్కీ రుచి ఎలా ఉంటుంది అంటే... పుల్లగా ఉంటుందని తెలిపారు. ఐతే ఓ రహస్యమైన పదార్థాన్ని తాము విస్కీ తయారీలో కలుపుతామనీ దాని వల్ల ప్రత్యేక రుచి వస్తుందని చెబుతున్నారు. ఈ విస్కీ బాటిల్ ఒక్కో దాని ధరను $65 (రూ.5065)గా నిర్ణయించారు. ఒక్కో బాటిల్‌లో 750 ఎంఎల్ విస్కీ ఉంటుంది.

అమెరికా, యూరప్ దేశాల్లో ఈపీతల సంఖ్య విపరీతంగా పెరిగిపోయిందట . ఇవి మిగతా జీవులను పెరగనివ్వకుండా చంపేస్తున్నాయనే వాదన ఉంది. వీటి వల్ల పర్యావరణ సమతుల్యత దెబ్బతింటోందని అంటున్నారు. వీటిని కంట్రోల్ చేసేందుకు ఈ డిస్టిల్లరి ఎన్ హెచ్ గ్రీన్ క్రాబ్ ప్రాజెక్టుతో చేతులు కలిపింది. దీని వల్ల స్థానికులు ఈ పీతల్ని పట్టి డిస్టిల్లరీకి ఇస్తారు. తద్వారా వారికి ఉపాధి లభిస్తుందని డిస్టిల్లరీ చెబుతోంది. ప్రస్తుతం న్యూ హ్యాంప్‌షైర్ నుంచి ఈ పీతల్ని సేకరిస్తున్నారు.

"ఈ సమస్యకు పరిష్కారాన్ని మేము ఫన్నీ, ఆసక్తికర పద్ధతిలో కనుక్కున్నాం. ఇందులో మేము క్రియేటివిటీని చూస్తున్నాం. ఈ కొరికే జీవులను మేము టేస్టీ ట్రీట్‌గా మార్చేస్తున్నాం" అని డిస్టిల్లరీ ఓనర్ స్టీవెన్ గ్రాస్సే తెలిపారు. "మన శత్రువులను తినేయడం ద్వారా మనం ఈ పోరాటంలో నెగ్గుతాం" అని ఆయన అభిప్రాయం వ్యక్తం చేశారు.