ఇకా గోవా బీచ్ లో ఓపద్దతితో ఉండాలి...లేకపోతే చలాన్ తో వాత

గోవా అంటేనే బీచ్ లలో ఆనందంతో కేరింతలు వేయడం అంటారు ఎవరైనా. కానీ ఇపుడు మీ ఆనందానికి ఓ పరిమితి, పద్దతి ఉంటుందని అక్కడి పోలీసులు చెబుతున్నారు. మనం ఎప్పుడైనా సరే కొత్త ప్రదేశానికి వెళ్లినప్పుడు మరింత ఎక్కువ అప్రమత్తంగా ఉండాలి. అక్కడి రూల్స్, రెగ్యులేషన్స్‌ని తప్పక పాటించాలి. మన ఊళ్లో కాలర్ ఎగరేసుకొని తిరిగినట్లు... వేరే చోట తిరిగితే అక్కడి వారు ఊరుకోరు. ఢిల్లీకి చెందిన ఓ వ్యక్తి గురువారం... గోవాలోని అంజునా బీచ్‌లో ఇష్టమొచ్చినట్లు కారు నడిపాడు. విషయం పోలీసుల దృష్టికి వెళ్లింది. ఐపీఎస్ సెక్షన్లు 279, 336 కింద ఎఫ్ఐఆర్ నమోదైంది. కారు నడిపింది ఎవరంటే.. ఢిల్లీలోని మంగోల్పురికి చెందిన లలిత్ కుమార్ దయాల్ అని తెలిసింది. ఈయనగారు కారు నడుపుతూ ఇతర పర్యాటకులకు ఇబ్బంది కలిగించాడు. నానా హంగామా చేశాడు. చివరకు కారు బీచ్‌లోని ఇసుకలో కూరుకుపోయింది.

ఈ ఘటనకు సంబంధించిన వీడియోని ట్విట్టర్‌లోని @goanewshub అకౌంట్‌లో జూన్ 16, 2022న పోస్ట్ చేశారు. దీన్ని గమనిస్తే... లలిత్... హ్యాందాయ్ క్రెటా ఎస్ యూవీ నడుపుతూ కనిపించాడు. కారు ఇసుకలో ఇరుక్కుపోయిన తర్వాత అందులోని వారు బయటకు వస్తూ... దాన్ని ఎలా అక్కడి నుంచి తప్పించాలో అర్థం కాక తలలు పట్టుకున్నట్లు వీడియోలో కనిపిస్తోంది.

బీచ్‌లో ఇసుక ఉంటుంది. ఇసుకలో టైర్లు సరిగా వెళ్లవు. అది తెలిసి కూడా ఎలా నడిపాడో చూశారుగా. అది గోవాలో రిజిస్టరైన కారు. పోలీసులు కారును సీజ్ చేశారు. కారు ఓనరైన సంగీతా గవదల్కర్‌పై ఆర్టీఓ కి రిపోర్ట్ ఇచ్చారు. ఈ సంగీతా.. గోవాలోని మాపుసాలో ఉన్నట్లు తెలిసిందని అంజునా పోలీస్ ఇన్‌స్పెక్టర్ విక్రమ్ నాయక్ తెలిపారు.

ఈ నెల ప్రారంభంలో దాదాపు ఇలాంటిదే మరో ఘటన లఢక్‌లో జరిగింది. రాజస్థాన్... జైపూర్‌కి చెందిన ఓ జంట... టయోట ఫార్చునర్‌ని నుబ్రా లోయలోని హుందర్ ఇసుక తిన్నెలపై నడిపారు. అలా చెయ్యకూడదని స్థానిక అధికారులు చెప్పినా చేశారు. మరి పోలీసులు ఎందుకు ఊరుకుంటారు. లేహ్ పోలీసులు రూ.50,000 ఫైన్ వేశారు. ఐతే.. ఆ కారుపై లైసెన్స్ ప్లేట్ ఢిల్లీది లా ఉంది.

అంతకుముందు.. కొంతమంది టూరిస్టులు... లఢక్‌లోని ప్యాంగోంగ్ సో సరస్సులో కారు నడిపారు. ఆడి కారులో ఇద్దరు వ్యక్తులు సన్ రూఫ్ ద్వారా సగం పైకి లేచి... హంగామా చేశారు. అంతేకాదు... సరస్సులో ఓ టేబుల్, చైర్ కూడా వేశారు. టేబుల్‌పై ఆహారం, మద్యం బాటిల్స్ ఉంచారు. మూన్ లైట్ డిన్నర్ లాగా ఏర్పాటు చేసుకున్నారు. ఇలా ఇష్టమొచ్చినట్లు చేస్తున్నారు కొంతమంది. ఇలాంటి వాళ్లపై ఫైన్లతోపాటూ కఠిన చర్యలు తీసుకోవాలని నెటిజన్లు కోరుతున్నారు.