ఇలా అయితే భరించలేం...ప్రైవేటు అయిల్ కంపెనీల స్పష్టీకరణ

అంతర్జాతీయంగా క్రూడాయిల్ ధరలు, క్రూడ్ సంబంధిత ఉత్పత్తుల ధరలు దశాబ్దాల గరిష్టానికి ఎగిశాయి. కానీ 90 శాతం మార్కెట్ నియంత్రణను కలిగిన ప్రభుత్వ రంగ ఆయిల్ కంపెనీలు.. పెట్రోల్, డీజిల్ ధరలను గత కొంత కాలంగా యథాతథంగా ఉంచుతున్నాయి. దీని వల్ల జియో-బీపీ, రోజ్‌నెట్‌కు చెందిన నయారా ఎనర్జీ, షెల్ వంటి కంపెనీలు తీవ్ర నష్టాలను ఎదుర్కొంటున్నాయి. ఈ నష్టాల బారి నుంచి తప్పించుకునేందుకు అమ్మకాలను తగ్గించడం లేదా ధరలు పెంచడం చేస్తున్నాయి. దీంతో తమ కస్టమర్లను ఈ కంపెనీలు కోల్పోతున్నాయి.

లీటరు పెట్రోల్‌పై రూ.14-18 నష్టాన్ని, లీటరు డీజిల్‌పై రూ.20-25 నష్టాన్ని భరిస్తున్నట్టు ప్రైవేట్ కంపెనీలు ప్రభుత్వానికి తెలిపాయి. క్రూడాయిల్ ధరలు భారీగా పెరుగుతున్నప్పటికీ.. ప్రభుత్వ ఆయిల్ మార్కెటింగ్ కంపెనీలు ధరలను పెంచకపోతుండటంతో.. తాము తీవ్ర నష్టాలు పాలవుతున్నట్టు ప్రైవేట్ ఇంధన కంపెనీలు తెలిపాయి. ఇలా అయితే తాము వ్యాపారాలు నడపడం కష్టమని తేల్చిచెబుతున్నాయి. ఈ నష్టాల నుంచి తమల్ని కాపాడాలంటూ జియో-బీపీ, నయారా ఎనర్జీ వంటి ప్రైవేట్ ఇంధన కంపెనీలకు చెందిన ఇండస్ట్రీ బాడీ, ఆయిల్ మంత్రిత్వ శాఖను కోరుతుంది. ఆచరణీయమైన పెట్టుబడుల వాతావరణాన్ని క్రియేట్ చేయాలని ఆయిల్ మంత్రిత్వ శాఖను కోరింది.

ప్రైవేట్ రిటైలర్లు ఇంధన సరఫరా సరిగ్గా చేయకపోతుండటంతో.. దేశవ్యాప్తంగా కొన్ని ప్రాంతాలలో నిల్వలు నిండుకున్నాయి. దీంతో కొన్ని ప్రాంతాలలో ధరలు పెరిగాయి. అయితే ప్రైవేట్ కంపెనీలకు ప్రభుత్వం కీలక ఆదేశాలు జారీ చేసింది. ఈ ప్రైవేట్ సంస్థలను కూడా యూనివర్సల్ సర్వీసు అబ్లిగేషన్ కిందకు తీసుకొస్తూ.. తప్పనిసరిగా తుది కస్టమర్ వరకు పెట్రోల్, డీజిల్‌ను అందించే బాధ్యతను నిర్వర్తించాలని పేర్కొంది. సప్లయిలో సమస్యలు క్రియేట్ చేయొద్దని సూచించింది.

ఇదిలావుంటే అంతర్జాతీయంగా క్రూడాయిల్ ధరలు పెరుగుతున్నా.. నవంబర్ 2021 నుంచి మార్చి 21, 2022 వరకు పెట్రోల్, డీజిల్ ధరలను మార్చలేదు. ఆ తర్వాత మార్చి 22, 2022 నుంచి 14 సార్లు ధరలను మార్చాయి కంపెనీలు. మొత్తంగా పెట్రోల్, డీజిల్‌పై రూ.10 మేర ధర పెంచాయి. మళ్లీ ఏప్రిల్ 8 నుంచి ధరలు స్థిరంగా ఉంచాయి కంపెనీలు. ఆ తర్వాత మే 21న ప్రభుత్వం ఎక్స్చేంజ్ డ్యూటీని తగ్గించడంతో ధరలు దిగొచ్చాయి. మళ్లీ అప్పటి నుంచి ధరలు మారలేదు.