డెబిట్, క్రెడిట్ కార్డులపై ఆర్భీఐ కీలక నిర్ణయాలు

డెబిట్, క్రెడిట్ కార్డులకు సంబంధించి ఆర్భీఐ పలు కీలక నిర్ణయాలను తీసుకొంది. డెబిట్, క్రెడిట్ కార్డుల జారీకి సంబంధించిన మూడు కొత్త రెగ్యులేటరీ మార్గదర్శకాల అమలుకు ఆర్‌బీఐ మరో మూడు నెలల గడువు ఇచ్చింది. ప్రస్తుత పొడిగింపుతో ఆర్‌బీఐ జారీ చేసిన మాస్టర్ డైరెక్షన్స్‌లో మూడు కొత్త మార్గదర్శకాలు అక్టోబర్ 1 నుంచి అమల్లోకి రానున్నాయి. ఇండస్ట్రీ వాటాదారుల నుంచి వెల్లువెత్తిన పలు అభ్యర్థనలతో తాము ఈ నిర్ణయం తీసుకున్నట్టు ఆర్‌బీఐ చెప్పింది. కార్డులకు చెందిన మాస్టర్ డెరెక్షన్స్‌‌లో మార్పులను అమలు చేసేందుకు ఆరు నెలల గడువు ఇవ్వాలని ఇండియన్ బ్యాంకు అసోసియేషన్ (ఐబీఏ) కోరింది.

ఆర్‌బీఐ మూడు నెలల పాటు అదనపు గడువు ఇచ్చిన మూడు ప్రొవిజన్లలో ఒకటి... క్రెడిట్ కార్డు పొందిన వ్యక్తి కార్డు జారీ అయిన నాటి నుంచి 30 రోజుల తర్వాత కూడా తనకు తానుగా దాన్ని యాక్టివేట్ చేసుకోకపోతే.. కార్డు హోల్డర్ నుంచి వన్ టైమ్ పాస్‌వర్డ్ ఆధారిత అనుమతితో దాన్ని యాక్టివేషన్‌ను కార్డు జారీదారులు చేపట్టాలి. అయితే కార్డు యాక్టివేట్‌కు కస్టమర్ అనుమతి ఇవ్వకపోతే.. ఏడు పనివేళల్లో కస్టమర్‌పై ఎలాంటి ఛార్జీ విధించకుండానే క్రెడిట్ కార్డు అకౌంట్‌ను కార్డు జారీదారులు మూసివేయాలి.

ఇక రెండో నిబంధన.. కార్డు హోల్డర్ అనుమతిని కోరకుండా ఎట్టిపరిస్థితుల్లో క్రెడిట్ కార్డు పరిమితి విషయంలో ఉల్లంఘనకు పాల్పకూడదు. ఇక మూడో ప్రొవిజన్.. వడ్డీని లెక్కించడం కోసం అన్‌పెయిడ్ ఛార్జీలను పరిగణనలోకి తీసుకోకూడదు. మాస్టర్ డైరెక్షన్లకు చెందిన మిగిలిన ప్రొవిజన్ల అమలు విషయంలో ఎలాంటి మార్పు లేదు. మిగిలిన ప్రొవిజన్లు జూలై 1 నుంచే అమల్లోకి వస్తున్నాయి. ఫిన్‌టెక్ ప్లేయర్లకు ఎలాంటి ఊరటను ఆర్‌బీఐ ఇవ్వలేదు.