ఎలాన్ మస్క్ కు దూరంగా ఉండాలనుకొంటున్నా: ఆమెగా మారిన అతడి కుమారుడి పిటిషన్

తల్లిందండ్రులకు దూరంగా పిల్లలు వెళ్లిపోతున్న రోజులివి. అదే ధనవంతుల పిల్లలైతే దూరంగా పోయినా తండ్రి వారసత్వాన్ని కోల్పోవడానికి ఇష్టపడ్డరు.  కానీ  టెస్లా అధినేత ఎలాన్ మాస్క్ అందుకు భిన్నమైన పరిస్థితిని ఎదుర్కొంటున్నారు. టెస్లా అధినేత ఎలాన్ మస్క్ ట్రాన్స్‌జెండర్ కుమార్తె తన పేరు మార్చాలని కోర్టులో పిటిషన్ దాఖలు చేసింది. తనకు 18 ఏళ్ల నిండటంతో ఇకపై తాను ఏ విధంగానూ తండ్రితో సంబంధాలను కోరుకోవడం లేదని, తన కొత్త లింగ గుర్తింపును సూచించే సర్టిఫికెట్‌ను మంజూరు చేయాలని కోరుతూ శాంటా మోనికాలోని లాస్ ఏంజిల్స్ కౌంటీ సుపీరియర్ కోర్టులో ఈ ఏడాది ఏప్రిల్‌లో పిటిషన్ వేసింది. ట్రాన్స్‌జెండర్‌ హక్కుల విషయంలో రిపబ్లికన్‌ పార్టీకి ఎలాన్ మస్క్ మే నెలలో మద్దతు ప్రకటించారు. కొత్త చట్టం ప్రకారం అమెరికాలో ట్రాన్స్‌జెండర్‌ హక్కులపై పరిమితులు విధిస్తారు. ఈ కారణంతోనే తండ్రి వైఖరిపై అసంతృప్తితో జేవియర్ అలియాస్‌ వివియన్‌ ఇలా పిటిషన్‌ వేసి ఉంటుందని భావిస్తున్నారు.

ఇదిలావుంటే ఈ పిటిషన్ ఆన్‌లైన్ కథనాల ద్వారా తాజాగా వెలుగులోకి వచ్చింది. ఇటీవలే 18 ఏళ్లు నిండిన జేవియర్ అలెగ్జాండర్ మస్క్ తన లింగ గుర్తింపును మగ నుంచి ఆడగా మార్చాలని, తన కొత్త పేరును నమోదు చేయాలని కోరారు.

కెనడా నటి జస్టిన్‌ విల్సన్‌‌ను 2000లో మస్క్ వివాహం చేసుకున్నారు. ఈ ఇద్దరికీ ఆరుగురు సంతాన కాగా.. మొదటిసారి ఐవీఎఫ్‌ ద్వారా కవలు పుట్టారు. వీరిలో ఒకరైన జేవియర్ అలెగ్జాండర్‌ మస్క్‌. మొదటి భార్య జస్టిన్‌‌తో మస్క్ 2008లో విడిపోయారు. అయితే, విడాకుల తర్వాత పిల్లల సంరక్షణ బాధ్యతను ఇద్దరూ సమానం నిర్వర్తిస్తున్నారు. కానీ, అలెగ్జాండర్‌ మస్క్ సర్జరీ ద్వారా అమ్మాయిగా మారిపోయాడు. తన పేరును వివియన్‌ జెన్నా విల్సన్‌గా మార్చుకుంది.

‘‘నేను ఇకపై ఏ విధంగానూ ఆకారం, రూపం, గుర్తింపులో.. కన్నతండ్రి నుంచి దూరంగా ఉండాలనుకుంటున్నాను... ఆయన గుర్తింపు ఇకపై నాకు అవసరం లేదు... నా పేరు మార్పిడికి అనుమతించండి.. నా లింగమార్పిడికి చట్టబద్ధత కల్పించండి’’ కోర్టులో పిటిషన్‌ దాఖలు చేసింది.

జేవియర్ అలెగ్జాండర్‌ మస్క్ (వివియన్‌ జెన్నా విల్సన్‌) తన కొత్త పేరుకు అధికారిక గుర్తింపు కోరడంతో పాటు కన్న తండ్రి ఎలాన్‌ మస్క్‌ గుర్తింపు, ఆయన అందించే సాయాలను రద్దు చేయాలని తన పిటిషన్‌లో పేర్కొంది. తండ్రి నీడన బతకడం తనకు ఇష్టం లేదని స్పష్టం చేసింది. అయితే, మస్క్, జేవియర్ అలెగ్జాండర్ మధ్య గొడవ ఏంటన్నదానిపై స్పష్టత లేదు. ఇరు పక్షాల న్యాయవాదులు సైతం దీనిపై స్పందించలేదు.

ఇదిలావుంటే లింగమార్పిడి వ్యక్తులు తమకు ఇష్టమైన పేర్లను ఎంచుకునే అంశంపై 2020లో మస్క్ తూతూ మంత్రంగా ట్వీట్ చేశారు. ‘‘నేను ట్రాన్స్‌కు పూర్తిగా మద్దతు ఇస్తున్నాను.. అయితే ఈ సర్వనామాలన్నీ ఒక అందమైన పీడకల’’ అని వ్యాఖ్యానించారు.