కొట్టుకుపోయిన బ్రిడ్జ్ ని...కేవలం నాలుగు గంటల్లో నిర్మించారు

మనిషి తల్చుకొంటే సాధించలేనిది ఏదీ లేదు అని చెప్పవచ్చు. సరిహద్దులో పహారా కాయడమే కాదు, ఆపద సమయాల్లో సాహసోపేతమైన చర్యలతో ఇండియన్ ఆర్మీ.. అందరి మనసులను గెలుచుకుంటోంది. అమర్‌నాథ్ యాత్ర కొనసాగే మార్గంలో సున్నితమైన ప్రాంతాల్లో భద్రతా బలగాలను భారీగా మోహరించారు. భద్రతను కట్టుదిట్టంచేయడమే కాదు అక్కడ ఓ నిర్మాణ కార్యక్రమం పూర్తిచేసి అందరి చేత మమ అని పించుకొంటున్నారు.

అమర్‌నాథ్ యాత్రా మార్గంలో కూలిన బ్రిడ్జిని గంటల వ్యవధిలోనే పునరుద్ధరించి ఔరా అనిపించింది ఇండియన్ ఆర్మీ. ఆర్మీకి చెందిన చినార్ కార్ప్స్ ఈ ఘనత సాధించింది. హిమాలయ పర్వత శ్రేణుల్లో, 3880 మీటర్ల ఎత్తులో కొనసాగే అమర్‌నాథ్ యాత్ర జూన్ 30న తిరిగి ప్రారంభమైన సంగతి తెలిసిందే. రెండేళ్ల తర్వాత పూర్తి స్థాయిలో ప్రారంభమైన ఈ యాత్రకు ఈసారి భక్తులు పోటెత్తారు. అటు ఉగ్రవాద దాడులు జరిగే ముప్పు ఉండటంతో యాత్ర జరిగే మార్గంలో భద్రతా బలగాలను పెద్ద సంఖ్యలో మోహరించారు.

ఇండియన్ ఆర్మీకి చెందిన చినార్ కార్ప్స్.. అమర్‌నాథ్ యాత్రకు సంబంధించిన ఏర్పాట్లను పర్యవేక్షిస్తోంది. ఉష్ణోగ్రతల్లో పెరుగుదల కారణంగా జూన్ 30, జులై 1 మధ్య రాత్రి మంచు చరియలు విరిగిపడి యాత్రా మార్గంలో బల్తాల్ వద్ద వంతెనలు కొట్టుకుపోయాయి. కాళీ మాతా ఆలయ సమీపంలోని ప్రవాహం వద్ద ఈ ఘటన చోటు చేసుకుంది.

బ్రిడ్జి కొట్టుకుపోయిన విషయాన్ని గమనించిన ఆర్మీ జవాన్లు.. వెంటనే పునరుద్ధరణ చర్యలు చేపట్టారు. ప్రత్యేక హెలికాప్టర్‌లో బ్రిడ్జి నిర్మాణానికి అవసరమైన కర్రలు, సరకును తరలించారు. ఇంజినీర్ రెజిమెంట్‌కు చెందిన సభ్యులను, సాంకేతిక నిపుణులను అక్కడికి తరలించారు. వెంటనే పనులు ప్రారంభించి కేవలం 4 గంటల్లోనే అక్కడ కొత్త బ్రిడ్జిని నిర్మించారు. అమర్‌నాథ్ యాత్ర నిరాటంకంగా కొనసాగేలా చేశారు.

సరిహద్దులో పహారా కాయడమే కాదు, ఆపద సమయాల్లో సాహసోపేతమైన చర్యలతో ఇండియన్ ఆర్మీ.. అందరి మనసులను గెలుచుకుంటోంది. అమర్‌నాథ్ యాత్ర కొనసాగే మార్గంలో సున్నితమైన ప్రాంతాల్లో భద్రతా బలగాలను భారీగా మోహరించారు. 200 హైపవర్డ్ బుల్లెట్‌ప్రూఫ్ వాహనాలను సిద్ధంగా ఉంచారు. జవాన్లతో పాటు 130 స్నిఫర్ డాగ్స్ ఇక్కడ విలువైన సేవలు అందిస్తున్నాయి.