ఓలా నీకు గుడ్ బై...కంపెనీని వీడుతన్న ఉన్నత ఉద్యోగులు

ఓలా ఎలక్ట్రిక్ కంపెనీకి కాలం కలసిరావడంలేదు. ఆ కంపెనీకి ఒక్కోక్కరుగా ఉన్నతాధికారులు గుడ్ బై చెబుతున్నారు. తాజాగా మరో ఉన్నతాధికారి గుడ్‌బై చెప్పారు. గత రెండు నెలల వ్యవధిలో కంపెనీ నుంచి వైదొలిగిన 32వ అధికారి ఇతను. ఓలా ఎలక్ట్రిక్ మొబిలిటీ ఛార్జింగ్ నెట్‌వర్క్‌కి బిజినెస్ హెడ్‌, సీనియర్ డైరెక్టర్‌గా ఉన్న యశ్వంత్ కుమార్ కంపెనీని వీడినట్టు ఈటీఆటో రిపోర్టు చేసింది. ఓలా ఎలక్ట్రిక్ హ్యూమర్ రిసోర్సెస్(హెచ్‌ఆర్) డైరెక్టర్‌గా ఉన్న రంజిత్ కొండేశాన్ కంపెనీకి రిజైన్ చేసిన వెంటనే... ఛార్జింగ్ నెట్‌వర్క్‌కి హెడ్‌గా ఉన్న అధికారి కూడా బయటికి వచ్చేశారు. ఇప్పటికే ఓలా ఎలక్ట్రిక్ కంపెనీ మార్కెట్లో తీవ్ర విమర్శలు పాలవుతోంది. ఈ కంపెనీ స్కూటర్లు మంటల్లో కాలిపోయిన ఘటనలు వెలుగులోకి వచ్చిన దగ్గర్నుంచి ఓలా ఎలక్ట్రిక్‌ వార్తల్లో నిలుస్తోంది. దీంతో పాటు ఆ కంపెనీ సీఈవో భవీష్ అగర్వాల్ ఇటీవల చేసిన ఓ ట్వీట్ దుమారం రేపింది. ఎలక్ట్రిక్ వెహికిల్స్ మంటల్లో కాలిపోవడం సాధారణం అంటూ భవీష్ అగర్వాల్ ట్వీట్ చేశారు.

ప్రస్తుతం కంపెనీని వీడిన యశ్వంత్ కుమార్.. 2021 మార్చిలో ఓలా ఎలక్ట్రిక్‌లో చేరారు. అంతకుముందు ఐదేళ్ల పాటు ప్రొక్టర్ అండ్ గ్యాంబుల్ ప్రొడక్టు, బ్రాండ్ మార్కెటింగ్ డివిజన్‌లో పనిచేశారు. ఈ ఏడాది ఏప్రిల్‌లో ఓలా ఎలక్ట్రిక్ చీఫ్ మార్కెటింగ్ ఆఫీసర్ వరుణ్ దుబే తన వ్యక్తిగత కారణాలతో కంపెనీకి రాజీనామా చేశారు. మరో ఉన్నతాధికారి చీఫ్ టెక్నాలజీ ఆఫీసర్(సీటీఓ) దినేశ్ రాధాక్రిష్ణన్ కూడా కంపెనీని వీడారు. గతేడాది మే నెలలో కంపెనీ ప్రస్థానం ప్రారంభమైనప్పటి నుంచి ఓలా ఎలక్ట్రిక్‌లో ఉన్న ఆయన అకస్మాత్తుగా బయటికి వెళ్లిపోయారు. రీజనల్ హెడ్‌గా ఉన్న నిధి చతుర్వేది కూడా మే నెలలో బయటికి వెళ్లిపోయి, అమెజాన్‌లో చేరారు.

మరోవైపు టూవీలర్ ఈవీ అమ్మకాలు పెరుగుతున్నా.. ఓలా ఎలక్ట్రిక్ సేల్స్ మాత్రం తగ్గాయి. ఈ కంపెనీ అమ్మకాలు జూన్ నెలలో తగ్గిపోవడంతో.. ఓలా ఎలక్ట్రిక్ అమ్మకాల్లో నాలుగో స్థానానికి పడిపోయింది. వాహన్ డేటా ప్రకారం, ఓలా ఎలక్ట్రిక్ కేవలం 5,869 ఎలక్ట్రిక్ స్కూటర్లను మాత్రమే విక్రయించింది. ఏప్రిల్ నెలలో దేశంలో టాప్ ఈవీ ప్లేయర్‌గా ఓలా ఎలక్ట్రిక్‌నే ఉంది. అప్పటి నుంచి స్థిరంగా ఓలా ఎలక్ట్రిక్ పడిపోతూనే ఉంది.