ఎల్ఐసీ షేర్‌హోల్డర్లకు ఇది నిజంగా శుభవార్తే

ఎల్ఐసీ తన షేర్‌హోల్డర్లకు ఓ శుభవార్త తెలిపింది. డివిడెండ్ చెల్లింపులకు రికార్డు డేట్‌ను ఫిక్స్‌ చేసింది. ఆగస్టు 26, 2022 డివిడెండ్ చెల్లింపులకు రికార్డు డేట్‌గా నిర్ణయించినట్టు కంపెనీ సోమవారం స్టాక్ ఎక్స్చేంజీలకు తెలిపింది. డివిడెండ్‌తో పాటు ఎల్ఐసీ షేర్‌హోల్డర్లకు మరో గుడ్‌న్యూస్. లిస్టింగ్ నుంచి నష్టాల్లో ఉన్న ఈ స్టాక్‌కు మోతిలాల్ ఓస్వాల్ ‘బై’ రేటింగ్‌ను ఇచ్చింది. రూ.10 ఫేస్‌ వాల్యూ కలిగిన ఒక్కో షేరుకు రూ.1.50ల డివిడెండ్‌ను లైఫ్ ఇన్సూరెన్స్ కార్పొరేషన్ ఆఫ్ ఇండియా ప్రకటించింది. ప్రస్తుతం ఈ డివిడెండ్‌కు రికార్డు డేట్‌ను నిర్ణయించింది.

దేశంలో అతిపెద్ద ఐపీఓగా వచ్చిన ఎల్ఐసీ... మే నెలలో స్టాక్ మార్కెట్లో లిస్ట్ అయింది. ఈ కంపెనీ వార్షిక సాధారణ సమావేశం సెప్టెంబర్ 27, 2022న జరగబోతుంది. ప్రభుత్వ రంగానికి చెందిన ఎల్ఐసీ తన జాయింట్ వెంచర్ ఎల్ఐసీ(నేపాల్) లిమిటెడ్‌లో ప్రతిపాదిత రైట్స్ ఇష్యూ ద్వారా రూ.80.67 కోట్లను ఇన్వెస్ట్ చేస్తుంది. సోమవారం జరిగిన కంపెనీ బోర్డు మీటింగ్‌లో ఈ ప్రతిపాదనకు ఆమోదం తెలిపింది.

ఎల్ఐసీ లిస్టింగ్‌కు వచ్చిన తర్వాత విడుదల చేసిన క్వార్టర్ ఫలితాలలో.. ఎల్ఐసీ కన్సాలిడేటెడ్ నికర లాభం 17 శాతం తగ్గి రూ.2,409 కోట్లకు తగ్గింది. గతేడాది ఇదే క్వార్టర్‌లో కంపెనీ నికర లాభం రూ.2,917 కోట్లుగా ఉంది. ఈ ఇన్సూరెన్స్ కంపెనీ మొత్తం ఆదాయం రూ.2,12,230 కోట్లకు పెరిగింది. గత ఆర్థిక సంవత్సరంలో ఈ ఆదాయం రూ.1,90,098 కోట్లుగా ఉంది.

మే 17, 2022న స్టాక్ ఎక్స్చేంజీలలో లిస్ట్ అయిన తర్వాత.. ఎల్ఐసీ షేరు ధర(LIC share price) భారీగా పతనమైంది. రూ.949 వద్ద ఎల్ఐసీ షేర్లను ఇన్వెస్టర్లకు కేటాయించింది. అయితే ఈ ధరకు డిస్కౌంట్‌లో స్టాక్ ఎక్స్చేంజీలలో లిస్ట్ అయింది. ఐపీఓ ఇష్యూ ధర రూ.949 నుంచి ఎల్ఐసీ షేర్లు 34 శాతం తగ్గాయి.