నీటిలోకి బాలుడిని లాక్కెళ్లిన మొసలి
national | Suryaa Desk | Published : Tue, Jul 05, 2022, 04:19 PM
నీరున్న ప్రాంతాల్లో మొసలి సంచారముంటే అప్రమత్తంగా ఉండాల్సిందే. లేకపోతే ప్రాణాలు హరి అంటాయి. తాజాగా ఉత్తరాఖండ్‌లోని ఓ షాకింగ్ ఘటన చోటుచేసుకుంది. సన్‌పహార్ గ్రామంలో నదిని దాటుతున్న 13 ఏళ్ల చిన్నారిని మొసలి పట్టుకుని నీళ్లలోకి లాగేసింది. దీంతో అప్రమత్తమైన గ్రామస్థులు పోలీసులకు సమాచారం అందించారు. వెంటనే అటవీ శాఖ సిబ్బంది, పోలీసులు ఘటనా స్థలానికి చేరుకుని గాలింపు చర్యలు చేపట్టారు. అయినా సరే బాలుడి ఆచూకి లభించలేదు.
దాంతో గ్రామస్థులు ఆగ్రహానికి గురై అటవీ శాఖ సిబ్బంది సాయంతో మొసలిని పట్టుకున్నారు. అనంతరం మొసలిని ప్రభుత్వాసుపత్రికి తీసుకెళ్లి ఎక్స్‌రే చేయించారు. అయితే ఎక్స్‌రేలో మొసలి కడుపు ఖాళీగా కనిపించింది. చిన్నారి జాడ కనిపించలేదు. దాంతో గ్రామస్థులు ఆవేదన చెందారు. అయితే నదిలో ఇంకా మొసళ్లు ఉన్నాయని, వేరే మొసలి పిల్లవాడిని మింగి ఉంటుందని భావిస్తున్నారు. అయితే బాలుడు ఆచూకి కోసం ఘటనా స్థలంలో సహాయక చర్యలు కొనసాగుతూనే ఉన్నాయి. ముఖ్యమంత్రి పుష్కర ధామి బాధిత కుటుంబాలతో మాట్లాడి అన్ని విధాలా ఆదుకుంటామని హామీ ఇచ్చారు.
గతంలో ఉత్తరాఖండ్‌లోని హరిద్వార్ ఫారెస్ట్ డివిజన్‌లో ఇలాంటి ఘటన చోటుచేసుకుంది. సెప్టెంబర్‌ నెలలో ఎనిమిదేళ్ల బాలికను మొసలి చంపేసింది. లక్సర్ ప్రాంతంలోని కుడి బగ్వాన్‌పూర్ గ్రామంలో ఎనిమిదేళ్ల రాధిక, ఆమె సోదరి చిత్తడినేల వద్దకు వెళ్లారు. ఆ సమయంలో రాధికను ఓ మొసలి పట్టుకుని నీటిలోకి లాగేసింది. ఈ విషయాన్ని ఆమె సోదరి తల్లిదండ్రులకు చెప్పడంతో.. అటవీ శాఖ అధికారులకు సమాచారం ఇచ్చారు
|
|