ఘనంగా జరిగిన వింత పెళ్లి..బంధువులు.. స్నేహితుల మధ్య జరగడం మరో వింత

ఈ మధ్య కాలంలో వింత పెళ్లిళ్లు చూడాల్సిన దుస్థితి వస్తోంది. మగ, ఆడా పెళ్లికి భిన్నంగా పెళ్లిళ్ల తంతు అక్కడక్కడా కొనసాగుతున్నాయి. ఇదిలావుంటే మేళతాళాలు బంధువర్గం మధ్య కోల్‌కతా గే జంట ఒక్కటైంది. ఇద్దరు మగవాళ్లు అంగరంగ వైభవంగా పెళ్లి చేసుకున్నారు. అభిషేక్‌ రే, చైతన్య శర్మ అనే ఇద్దరు యువకులు.. బంధువులు, స్నేహితుల సమక్షంలో జూలై మూడో తేదీన అధికారికంగా ఒక్కటయ్యారు. ఇద్దరు ఒకరినొకరు ఇష్టపడ్డారు. కలసి జీవించాలనుకున్నారు. తమ మధ్య ఏర్పడిన సంబంధాన్ని మూడు ముళ్ల బంధంతో శాశ్వతం చేసుకోవాలనుకున్నారు. దానికోసం ఇంట్లో వాళ్లను ఒప్పించారు. వాళ్లు అంగీకరించడంతో ఎంతో సంప్రదాయబద్ధంగా వారు కల్యాణం చేసుకున్నారు.

అభిషేక్ ధోతీ, కుర్తాలో సంప్రదాయ బెంగాళీ వరుడిలా ముస్తాబుకాగా, చైతన్య శర్మ షేర్వాణీ ధరించి.. అందంగా తయారయ్యారు. సాధారణ పెళ్లిళ్లులాగానే మంగళ స్నానాల దగ్గర నుంచి పెళ్లి తంతు సాగింది. ఒకరి మెడలో మరొకరు పూల దండలు వేసుకున్నారు. అరుదైన ఈ వివాహానికి సంబంధించిన ఫొటోలు, వీడియోలను చైతన్య తన ఇన్‌స్టాగ్రామ్‌లో షేర్‌ చేశాడు. దీంతో ఇవి సోషల్ మీడియాలో వైరల్‌ అయ్యాయి.

ఇదిలావుంటే గతేడాది డిసెంబర్‌లో హైదరాబాద్‌లో కూడా ఒక గే జంట పెళ్లి చేసుకున్నారు. కోల్‌కతాకు చెందిన సుప్రియో చక్రవర్తి, ఢిల్లీకి చెందిన అభయ్ డాంగ్ అనే ఇద్దరు ఎనిమిదేళ్లు ప్రేమించుకున్నారు. ఇద్దరు హైదరాబాద్‌లో కలసి పని చేసేవారు. వీరిద్ధరూ ఒక డేటింగ్ యాప్ ద్వారా పరిచయం అయ్యారు. పెళ్లికి ముందు నుంచే వాళ్లు సహజీవనం చేయడం మొదలుపెట్టారు. నాలుగేళ్ల రిలేషన్‌షిప్‌లో ఉన్న తర్వాత ఇంట్లో వారిని ఒప్పించి పెళ్లి చేసుకున్నారు.