భారీ వర్షాలతో...వణుకుతున్న ముంబాయి

భారీ వర్షాల కారణంగా మహారాష్ట్ర రాజధాని ముంబాయి వణికిపోతోంది. అదే సందర్భంలో రాష్ట్రంలోని వివిధ ప్రాంతాల్లో భారీ వర్షాలు కురుస్తున్న నేపథ్యంలో సీఎం ఏక్‌నాథ్ షిండే ప్రభుత్వ ప్రధాన కార్యదర్శి మనుకుమార్ శ్రీవాస్తవతో చర్చించారు. అన్ని వర్షాల ప్రభావిత ప్రాంతాల్లో అధికారులు అప్రమత్తంగా ఉండాలని, పరిస్థితిని నియంత్రించాలని ఆదేశించారు. ముందు జాగ్రత్త చర్యగా ప్రభుత్వం ఎన్డీఆర్ఎఫ్ బలగాలను రంగంలోకి దించింది. కాగా కొన్ని రోజుల క్రితం వరకు వరదలతో అసోం అతలాకుతలం అయింది. భారీ వర్షాల కారణంగా చాలామంది ప్రాణాలు కూడా కోల్పోయారు. లక్షలాది మంది నిరాశ్రయులయ్యారు.

వర్షాలు ముంబైని ముంచెత్తుతున్నాయి. రుతు పవనాల ప్రభావంతో కురిసిన వర్షానికి లోతట్టు ప్రాంతాలు జలమయమయ్యాయి. నవీ ముంబైలోని ఖందేశ్వర్‌ రైల్వేస్టేషన్‌ కూడా పూర్తిగా నీటిమయం అయిపోయింది. ఆ ప్రాంతంలో మోకాళ్లలోతు వరకు నీళ్లు చేరాయి. దాంతో ప్రయాణికులకు తీవ్ర ఇబ్బందులు ఎదుర్కొంటున్నారు. అంధేరి ప్రాంతంలో కూడా కురుస్తోన్న భారీ వర్షానికి ప్రజలు అవస్థలు పడుతున్నారు. రహదారులపై వరద నీరు చేరడం వల్ల కొన్ని రూట్లలో బస్సు సర్వీసులకు అంతరాయం ఏర్పడింది. కొన్ని మార్గాల్లో బస్సులను దారి మళ్లించారు. ముంబైలో గత 12 గంటల్లో 95.81 మిల్లీమీటర్ల వర్షపాతం నమోదైంది.

భారీ వర్షాల కారణంగా మహారాష్ట్రలోని చిప్లూన్‌లో ముంబై-గోవా హైవే వద్ద కొండ చరియలు విరిగిపడ్డాయి. అంతకుముందు శనివారం రాత్రి, ఘాట్ వద్ద కొండ చరియలు విరిగిపడటంతో వాహనాల రాకపోకలు నిలిచిపోయాయి. అదేవిధంగా లోతట్టు ప్రాంతాల్లో ఉన్న రైల్వే ట్రాక్‌లపై వరద నీరు చేరుతోంది. అయితే ముంబైలో మరిన్ని వర్షాలు కురిసే అవకాశం ఉన్నట్టు భారతీయ వాతావరణ శాఖ వెల్లడించింది. ఈ మేరకు రాబోయే కొన్ని రోజుల్లో ప‌లు చోట్ల అతిభారీ వ‌ర్షాలు ప‌డే ఛాన్స్ ఉంది.