ఇటలీ వాసి అరుదైన రికార్డ్..తన గిన్నిస్ బుక్ రికార్డును తానే బద్దలు చేసి

కొందరు చేసే పనులు కాస్త ఆశ్చర్యానికి గురిచేస్తాయి. కానీ ఆ పనుల వెనక ఉన్న శ్రమ అంతా ఇంతా కాదు. వాటిని మనం గుర్తించం. కానీ  గిన్నిస్ బుక్ రికార్డ్ అలాంటి వాటిని గుర్తిస్తుంది. ఇదిలావుంటే ఇటలీకి చెందిన క్రిస్టియన్ కావాలెట్టి తన దగ్గర 12,042 పెప్సీ క్యాన్లు భద్రపరిచాడు. వాటిని చూస్తే... పెప్సీ క్యాన్లలో ఇన్ని రకాలు ఉన్నాయా అని మనకు అనిపించడం ఖాయం. ప్రపంచంలోనే ఎక్కువ పెప్సీ క్యాన్లను కలెక్ట్ చేసి... గిన్నీస్ వరల్డ్ రికార్డ్ సృష్టించాడు. ఆయన దగ్గర ప్రతీ ఖండంలోని పెప్సీ కాన్లూ ఉన్నాయి. కొన్నైతే చాలా ఏళ్లనాటివి ఉన్నాయి. 4,391 పెప్సీ టిన్లను సేకరించి క్రిస్టియన్... 2004 మార్చిలో.. తొలిసారి గిన్నీస్ బుక్ ఎక్కాడు. ఆ తర్వాత మరిన్ని సేకరించి.. తాజాగా తన రికార్డును తానే తిరగరాసుకున్నాడు. 

క్రిస్టియన్, ఆయన సోదరుడు ఎడోర్డో కలిసి 1989 నుంచి పెప్సీ క్యాన్లను సేకరిస్తున్నారు. 81 దేశాల నుంచి వాటిని తెచ్చుకున్నారు. అందువల్ల క్రిస్టియన్ ఇంట్లో ఎక్కడ చూసినా పెప్సీ క్యాన్లే ఉన్నాయి. వాటిలో మొదటి టిన్‌తోపాటూ... అరుదుగా రిలీజ్ చేసిన టిన్స్ కూడా ఉన్నాయి. పెప్సీ 1948లో మొదటిసారి క్యాన్‌ రూపంలో అమ్మింది. సేకరించిన టిన్లను ప్రత్యేక అరల్లో డెకరేట్ చేసి... ఇంటిని మ్యూజియంలా మార్చేశాడు క్రిస్టియన్.

ఈ క్యాన్లలో 1980లో రిలీజ్ చేసిన స్పేస్ క్యాన్ ప్రత్యేకమైనది. ఎందుకంటే మొదటిసారి ఓ వ్యోమగామి... స్పేస్ ఫ్లైట్‌లో వెళ్తూ ఆ పెప్సీ క్యాన్ తాగాడు. దాన్ని అంతరిక్షంలో తాగేందుకు వీలుగా తయారుచేశారు. అలాంటి క్యాన్‌‌ని కూడా క్రిస్టియన్ సేకరించాడు. అందుకు సంబంధించిన వీడియోని గిన్నీస్ బుక్ వారు జులై 6, 2022న తమ యూట్యూబ్ ఛానెల్‌లో అప్‌లోడ్ చేశారు. దీన్ని ఇప్పటివరకూ 37,109 మంది చూడగా... 1.5 వేల మందికి పైగా లైక్ చేశారు.

ఈ వీడియో చూసిన నెటిజన్లు కామెంట్స్ ఇస్తున్నారు. "నాకు ఇలాంటి కలెక్షన్ వీడియోలంటే ఇష్టం. ముఖ్యంగా గీన్నీస్ బుక్ వారి వీడియోలు చాలా ఇష్టం" అని ఓ యూజర్ రిప్లై ఇవ్వగా.. "క్రిస్ కంగ్రాట్స్. మరో వరల్డ్ రికార్డ్ దక్కింది. వాటి కోసం నువ్వు ఎంత కష్టపడి ఉంటావు, ఎంత మనీ ఖర్చు పెట్టి ఉంటావు, ఎంత సహనం ఉండాలి, ఎంత ఇష్టం, ప్రేమ ఉండాలి.. అవన్నీ కలిపి ఈ కలెక్షన్ అయ్యింది. మరిన్ని విజయాలు సాధించాలి" అని మరో యూజర్ కామెంట్ ఇచ్చారు.

ఇప్పటికే సేకరించిన క్యాన్లను జాగ్రత్తగా ఉంచిన క్రిస్టియన్... వాటిని మ్యూజియంలా చేసి... అందరికీ అందుబాటులోకి తెచ్చేందుకు ఏర్పాట్లు చేస్తున్నాడు. తన దగ్గర పెప్సీ క్యాన్లతోపాటూ... 15,000 రకరకాల క్యాన్లు ఉన్నాయి. రోజురోజుకూ ఈ సంఖ్య పెరుగుతూనే ఉంది. అదువల్ల మ్యూజియానికి వచ్చే సందర్శకులకు ఎప్పటికప్పుడు కొత్తదనం ఉంటుంది అని అంటున్నాడు.