తక్కువ ధరకు...13 రకాల సర్వీసులు ఓటీటీలో

మార్కెట్ లో పోటీతత్వం కారణంగా ప్రతి అంశంలో ధరలు కిందకు దిగివస్తున్నాయి. తాజాగా దేశంలో అతిపెద్ద న్యూట్రల్ టెలికాం ఇన్‌ఫ్రాస్ట్రక్చర్ ప్రొవైడర్లలో ఒకటైన రైల్‌టెల్.. ఓటీటీ సర్వీసులను లాంచ్ చేసింది. తన పాపులర్ రిటైల్ బ్రాడ్‌బ్యాండ్ సర్వీసు రైల్‌వైర్ ద్వారా కస్టమర్లకు 13 ఓటీటీ(ఓవర్-ది-టాప్) సర్వీసులను అందజేస్తున్నట్టు ప్రకటించింది. అపరిమిత బ్రాడ్‌బ్యాండ్ ప్లాన్లతో రైల్‌వైర్ సబ్‌స్క్రయిబర్లకు 13 ఓటీటీ సర్వీసులను ఆఫర్ చేస్తున్నామని మిని రత్నకు చెందిన ఈ పీఎస్‌యూ తెలిపింది. ‘రైల్‌వైర్‌ సాత్రాంగ్’ కాన్వాస్ కింద ఈ ప్లాన్లను రైల్‌టెల్ అందిస్తోంది.

రైల్‌వైర్ సబ్‌స్క్రయిబర్లకు వాల్యూ యాడెడ్ సర్వీసులుగా ఓటీటీ సర్వీసులను లాంచ్ చేశామని రైల్‌టెల్ డైరెక్టర్(ఫైనాన్స్) ఆనంద్ కుమార్ సింగ్ తెలిపారు. రైల్‌వైర్ బ్రాడ్‌బ్యాండ్ సర్వీసు అనేది అఫర్డబుల్ సర్వీసులని పేర్కొన్నారు. ఈ సర్వీసులకు 48 శాతానికి పైగా యూజర్లు గ్రామీణ ప్రాంతాల్లోనే ఉన్నట్టు చెప్పారు. తన నెట్‌వర్క్ ఇన్‌ఫ్రాస్ట్రక్చర్, సర్వీసు ఆఫర్‌ను బలోపేతం చేయడం ద్వారా కస్టమర్ అనుభవాన్ని మరింత పెంచుతోంది రైల్‌టెల్.

ఓపెన్ మార్కెట్ నుంచి బ్రాడ్‌బ్యాండ్ కస్టమర్లు కొనుగోలు చేసే ఇండివిడ్యువల్ ఓటీటీలతో పోలిస్తే.. రైల్‌టెల్ ఆఫర్ చేసే ఓటీటీలు సరసమైన ధరలలో అందుబాటులో ఉంటాయని ఆనంద్ కుమార్ చెప్పారు. ఈ ఓటీటీ ప్లాన్లకు రైల్‌వైర్ సబ్‌స్క్రయిబర్ల నుంచి మంచి ఆసక్తి రానుందని ఆనంద్ కుమార్ తెలిపారు. రైల్‌వైర్ సాత్రాంగ్ ప్లాన్లు యూజర్లు తమకు ఇష్టమైన కంటెంట్‌ను చూసేందుకు సాయం చేయనున్నాయని పేర్కొన్నారు. ఈ ఓటీటీ ప్యాక్‌లో పాటు అదనంగా 150కి పైగా ఛానళ్లను కస్టమర్లు చూసుకోవచ్చు. దేశవ్యాప్తంగా ఉన్న ప్రస్తుత 4.65 లక్షల మంది ఫైబర్-టూ-ది-హోమ్ రైల్‌వైర్ సబ్‌స్క్రయిబర్లకు, సరికొత్త యూజర్లకు ఈ ప్లాన్లు అందుబాటులో ఉంటాయి. స్మార్ట్ టీవీలు, ల్యాప్‌టాప్‌లు, స్మార్ట్‌ఫోన్లలో ఈ ఓటీటీ సర్వీసులను చూడొచ్చని రైల్‌టెల్ చెప్పింది.