పుస్తకాలు, యూనిఫాం ఇవ్వరా...అయితే వాటికి బదులు డబ్బులివ్వండి: ఓ తండ్రి బెదరింపులు

ఉపాధ్యాయులు ఓ విద్యార్థి తండ్రి కత్తితో బెదరించాడు. తమ పిల్లలకు పుస్తకాలు, యూనిఫాం ఇవ్వలేదు దీనికి బదులు డబ్బులు ఇవ్వాలని స్కూల్ ప్రధానోపాధ్యాయుడికి వార్నింగ్ ఇచ్చాడు. స్కూల్ ఫీజులు పెరిగాయని, పిల్లలకు పుస్తకాలు ఇవ్వలేదని తల్లిదండ్రులు రోడ్డెక్కి నిరసనలు తెలుపుతుంటారు. ధర్నాలు, దీక్షలు చేస్తుంటారు. ఇవన్నీ సహజంగా జరిగేవే.. కానీ బీహార్‌లో ఓ వ్యక్తి దీనికి భిన్నంగా ప్రవర్తించాడు. స్కూల్‌కు ఏకంగా బారెడు కత్తి పట్టుకుని వెళ్లి.. ప్రిన్సిపాల్, ఉపాధ్యాయులను బెదిరించాడు. అరారియాలో ఈ ఘటన చోటుచేసుకుంది. అరారియాలో తన పిల్లలకు ఇవ్వాల్సిన స్కూల్ యూనిఫాం, పుస్తకాలు అందలేదని ఓ వ్యక్తికి తీవ్రమైన కోపం వచ్చింది. దాంతో సంబంధిత స్కూల్‌కు వెళ్లి వీరంగం సృష్టించాడు.

జోకిహాట్ పోలీస్ స్టేషన్‌ పరిధిలోని భగవాన్‌పూర్ పంచాయతీకి చెందిన అక్బర్ అనే వ్యక్తి ఇటీవల తన పిల్లలు చదువుకుంటున్న స్కూల్‌కు వెళ్లాడు. కనీసం ఒంటి మీద చొక్కా కూడా వేసుకోకుండా, కేవలం లుంగితో.. చేతిలో పెద్ద కత్తితో వెళ్లి.. అందరిని బెదిరించాడు. తన పిల్లలకు ఇవ్వాల్సి యూనిఫాం, బుక్స్ అందలేదని, వాటికి బదులుగా డబ్బులు ఇవ్వాలని డిమాండ్ చేశాడు. డబ్బులు ఇవ్వకపోతే ప్రిన్సిపాల్‌ను, టీచర్లను చంపేస్తానని బెదిరించాడు. 24 గంటలు టైం ఇచ్చి.. అక్కడ నుంచి వెళ్లిపోయాడు.

దీంతో ఈ విషయంపై పాఠశాల ప్రధానోపాధ్యాయుడు పోలీసులకు ఫిర్యాదు చేశారు. పదే పదే ఇలా వచ్చి బెదిరిస్తుంటాడని పోలీసులకు చెప్పారు. ఈ మేరకు పోలీసులు ఎఫ్‌ఐఆర్ నమోదు చేశారు. ఈ సంఘటన గురించి జోకిహాట్ స్టేషన్ హౌస్ ఆఫీసర్ మాట్లాడుతూ "అరారియాలో స్కూల్ యూనిఫాం కోసం డబ్బు రాకపోవడంతో అక్బర్ అనే వ్యక్తి కత్తితో తన పిల్లల పాఠశాలకు వెళ్లాడు. 24 గంటల్లో డబ్బులు ఇవ్వకుంటే మళ్లీ వస్తానని ఉపాధ్యాయులను బెదిరించాడు." అని చెప్పారు. ఇదిలావుంటే దీనికి సంబంధించిన వీడియో సోషల్ మీడియాలో హల్‌‌చల్ చేస్తోంది. దానిని చూసిన నెటిజన్లు ఆ వ్యక్తిపై మండిపడుతున్నారు. పిల్లలున్న పాఠశాలకు కనీసం ఒంటిపై దుస్తులు లేకుండా వెళ్లడమేంటని ప్రశ్నిస్తున్నారు.