ఎమ్మెల్యేగా ప్రమాణ స్వీకారం చేసిన మేకపాటి విక్రమ్రెడ్డి
Andhra Pradesh Telugu | Suryaa Desk | Published : Mon, Jul 11, 2022, 04:28 PM
తన సోదరుడు గౌతమ్ రెడ్డి ఆశయాలను నెరవేరుస్తానని ఎమ్మెల్యే మేకపాటి విక్రమ్రెడ్డి వెల్లడించారు. నెల్లూరు జిల్లా ఆత్మకూరు ఎమ్మెల్యేగా మేకపాటి విక్రమ్రెడ్డి ప్రమాణ స్వీకారం చేశారు. తమ కుటుంబంపై ప్రేమ చూపించి భారీ మెజార్టీతో గెలిపించిన ఆత్మకూరు ప్రజలకు ధన్యవాదాలు తెలిపారు. తన సోదరుడు గౌతమ్ రెడ్డి ఆశయాలను నెరవేరుస్తానన్నారు. నెల్లూరు జిల్లాలో సీఎం జగన్ చేస్తున్న మంచి కార్యక్రమాలను ముందుకు తీసుకు వెళతామన్నారు. రాష్ట్రపతి ఎన్నికలు ఉండటంతో మంచిరోజు చూసుకొని ముందుగానే ప్రమాణ స్వీకారం చేశాను అన్నారు. విక్రమ్ ప్రమాణ స్వీకార కార్యక్రమంలో మంత్రి కాకాణి గోవర్థన్ రెడ్డితో పాటూ పలువురు ఎమ్మెల్యేలు ఉన్నారు.
మేకపాటి కుటుంబ వారసుడుగా మేకపాటి విక్రమ్ రెడ్డి రాజకీయాల్లోకి వచ్చారని.. విక్రమ్కు ప్రజలు సంపూర్ణ సహకారం అందించారన్నారు మంత్రి కాకాణి గోవర్థన్ రెడ్డి. ఆత్మకూరు నియోజకవర్గం ప్రజలు ఎంతో ప్రేమ చూపి విక్రమ్ రెడ్డికి ఘన విజయం అందించారని.. జగన్మోహన్ రెడ్డి మంచి ఆలోచనతో మేకపాటి విక్రమ్ రెడ్డికి టికెట్ ఇచ్చారన్నారు.
గత నెలలో జరిగిన ఆత్మకూరు ఉప ఎన్నికల్లో మేకపాటి విక్రమ్రెడ్డి భారీ మెజార్టీ సాధించిన విషయం తెలిసిందే. మేకపాటి గౌతమ్ రెడ్డి మరణంతో అనివార్యమైన ఈ బై పోల్లో విక్రమ్ రెడ్డి.. 82వేల 888 ఓట్ల భారీ మెజార్టీతో విజయాన్ని అందుకున్నారు. ఈ ఉప ఎన్నిక బరిలో నిలిచిన బీజేపీ అభ్యర్థి భరత్ కుమార్ డిపాజిట్ కోల్పోయారు. ఇక ప్రధాన ప్రతిపక్షం టీడీపీ పాత సంప్రదాయాన్ని కొనసాగిస్తూ పోటీకి దూరంగా ఉంది.
|
|