బాబు, లోకేష్ కు చిన్న మెదడు చిట్లింది: మంత్రి రోజా విమర్శ

చంద్రబాబు, నారా లోకేష్‌కి చిన్న మెదడు చిట్లిపోయిందని.. త్వరలోనే మానసిక వైకల్య కేంద్రంలో చంద్రబాబు చేర్పించాలని ఆంధ్రప్రదేశ్ రాష్ట్ర మంత్రి రోజా సెటైర్లు పేల్చారు. బోగస్ సర్వేలు చేయించే చంద్రబాబుని అందరు బోగస్ బాబుగా పిలుస్తున్నారని ఆమె ఎద్దేవా చేశారు. పది రోజులకి ముందు సీఎం అయినా మహారాష్ట్ర సీఎంకు టాప్ 5 ర్యాంకు.. మూడేళ్లుగా అన్ని పథకాలను అమలు చేస్తున్న ఏపీ సీఎం వైఎస్ జగన్‌కి అట్టడుగు ర్యాంకు ఇవ్వడంపై ఏంటని ప్రశ్నించారు. తిరుమల శ్రీవారిని మంత్రి రోజా ఉదయం విఐపీ దర్శన సమయంలో నటి రవళితో కలిసి దర్శించుకున్నారు. అనంతరం ఆలయం అర్చకులు ఆశీర్వదించి తీర్ధ ప్రసాదాలు అందజేశారు.  చంద్రబాబు నాయుడు ప్రెస్ మీట్ చూసిన తర్వాత ప్రజలంతా చీదరించుకుంటున్నారన్నారు మంత్రి. వైఎస్సార్‌సీపీ ప్లీనరీని చూసిన తర్వాత ఎవరైనా ఈ రాష్ట్రంలో ప్రజాభిమానం ఏ పార్టికి ఉంది అనేది అర్ధం అవుతుందని వ్యాఖ్యానించారు. ప్రజలంతా స్వచ్చందంగా వచ్చి వైఎస్సార్‌సీపీ ప్లీనరీలో ఏపి సీఎంను ఆశీర్వాదించారన్నారు. సర్వేలో సీఎం జగన్‌కు ఆరో స్ధానం వచ్చిందని చంద్రబాబు చెప్పడం హాస్యాస్పదంగా ఉందని.. చంద్రబాబుకి చిన్న మెదడు చితికి పోయి మాట్లాడుతున్నారని ఘాటు వ్యాఖ్యలు చేశారు.

మూడేళ్లు ఏపీలో సుపరిపాలన చేస్తూ వైఎస్ జగన్ మొదటి స్ధానంలో ఉన్నారని ఆమె చెప్పారు.. ఎప్పుడూ బోగస్ సర్వేలు చేసే చంద్రబాబుని ప్రజలంతా బోగస్ బాబు అని పిలుస్తున్నారని ధ్వజమెత్తారు. రాష్ట్రంలో టీడీపీ అధికారంలోకి వచ్చే పరిస్ధితి లేదని.. ముఖ్యమంత్రి వైఎస్ జగన్ ప్రవేశ పెట్టిన నవరత్నాలు భగవద్గీతగా, ఖురాన్, బైబిల్ గా చూశారన్నారు. చంద్రబాబు రింగులో చిప్పు పెట్టుకోవడం కాదని.. బుర్రలో చిప్పు ఉండాలన్నారు. నారా లోకేష్‌కి చిన్నతనం నుండే చిప్పు లేదని ఘాటుగా స్పందించారు.

బీజేపీ ఓ గిరిజన మహిళకు అత్యున్నతమైన రాష్ట్రపతి స్ధానం ఇస్తుంటే జగన్, వైఎస్సార్‌సీపీ మద్దతు ఇస్తుంటే చంద్రబాబు ఏం మాట్లాడాడో అందరికి తెలుసు అన్నారు. రాజకీయంగా చంద్రబాబు దిగజారి పోయారని.. ఆయన్ను మానసిక అంగ వైకల్యం కేంద్రంలో చేర్చుతామని కొడాలి నాని అని చెప్పారని.. అది త్వరలోనే జరుగుతుందన్నారు మంత్రి రోజా.