ఇంటిని అద్దెకు తీసుకొని..అందులో ముద్దుల ఛాలెంజ్ నిర్వాహణ

మన పిల్లులు టీనేజ్ లో ఉన్న సమయంలో చాలా రకాలుగా చెడిపోయే అవకాశముంది. అందుకే ప్రతి టీనేజర్ తల్లిదండ్రలు తమ పిల్లలపై నిఘా పెట్టాల్సిన అవసరం ఎంతైనా ఉందని ఈ ఘటన తెలియజేస్తోంది. కర్ణాటకలోని మంగళూరులో ముద్దుల ఛాలెంజ్ ను నిర్వహించిన ఎనిమిది మంది విద్యార్థులపై ఫోక్సో చట్టం కింద కేసు నమోదు చేసినట్టు పోలీసులు శుక్రవారం తెలిపారు. ఓ ప్రముఖ కాలేజీకి చెందిన మైనర్ విద్యార్థులు ఓ ఇంట్లో ఇతరుల సమక్షంలో ముద్దులు పెట్టుకుంటున్న వీడియో సోషల్ మీడియాలో వైరల్ అయింది. అది వివాదాన్ని రేకెత్తించింది. ఆ వీడియోలో ఓ అమ్మాయి, అబ్బాయి ముద్దు పెట్టుకుంటుండగా మిగతా స్నేహితులు వారిని ప్రోత్సహించారు.

విద్యార్థులు కొన్ని నెలల పాటు అద్దెకు ఫ్లాట్‌ను తీసుకుని స్నేహితులందరూ ట్రూత్ అండ్ డేర్ గేమ్ ఆడారని, అందులో భాగంగా లిప్ లాక్ ఛాలెంజ్‌ను నిర్వహించినట్టు పోలీసుల విచారణలో తేలింది. ఆ లిప్‌లాక్‌కు సంబంధించిన వీడియో సోషల్ మీడియాలో ప్రత్యక్షమై.. రాష్ట్రవ్యాప్తంగా కలకలం సృష్టించింది. ఆ వీడియో తీసి వైరల్ చేసిన విద్యార్థుల్లో ఒకరిని.. ఆ తర్వాత మరో ముగ్గురిని పోలీసులు అదుపులోకి తీసుకున్నారు. ఈ మేరకు మంగళూరులోని పాండేశ్వర మహిళా పోలీస్ స్టేషన్‌లో విద్యార్థినులపై పోక్సో కేసు నమోదైంది. అయితే నిందితుల్లో ఒక విద్యార్థి విదేశాలకు వెళ్లినట్టు తెలుస్తుంది. నిందితులందరినీ పోలీసులు విచారించనున్నారు.

అయితే మంగళూరులోని ఓ ఫ్లాట్‌లో కొన్ని నెలల క్రితం ఈ ఘటన జరిగిందని నగర పోలీస్ కమిషనర్ ఎన్.శశికుమార్ తెలిపారు. విద్యార్థులు లిప్‌లాక్ ఛాలెంజ్‌లో భాగంగా ముద్దులు పెట్టుకున్నారని, దీనికి సంబంధించిన వీడియోను ఓ అబ్బాయి వారం రోజుల క్రితం వాట్సాప్‌లో పెట్టాడని చెప్పారు. ఇది పాఠశాల యాజమాన్యం దృష్టికి రావడంతో అధికారులు విద్యార్థులను హెచ్చరించి సస్పెండ్ చేశారని శశికుమార్ తెలిపారు. ఈ సందర్భంగా విద్యార్థుల కార్యకలాపాలపై నిఘా ఉంచాలని పోలీసు శాఖ కళాశాల, పాఠశాల అధికారులను ఆదేశించింది. అంతేకాదు ఇది సంక్షోభంగా మారే అవకాశం ఉండటంతో మంగళూరు పోలీసులు వేగంగా చర్యలు తీసుకున్నారు. విద్యార్థులు డ్రగ్స్‌ సేవించారా అనే కోణంలో కూడా పోలీసులు తనిఖీలు చేస్తున్నారు.