నకిలి నోట్ల దొంగను పట్టించిన...డిపాజిట్ మిషన్

నకిలి నోట్ల వ్యవహారంలో ఉన్నత హోదాలో ఉన్నవారుసైతం మోసపోతారు. కానీ మిషన్లు మోసపోవు. అదే జరిగింది విజయవాడలో. విజయవాడలో నకిలీ నోట్ల వ్యవహారం కలకలంరేపింది. కేటుగాళ్లు కొత్త మార్గాల్లో.. భారీగా నకిలీ నోట్లను తెచ్చి దర్జాగా మార్చేందుకు ప్రయత్నించారు. ముందు ప్రయోగాత్మకంగా ప్రయత్నం చేశాడు. కానీ కథ అడ్డం తిరిగి సీన్ రివర్స్ అయ్యింది.. పోలీసులకు అడ్డంగా బుక్కయ్యారు. విజయవాడకు చెందిన ఓ వ్యక్తి నకిలీ నోట్లతో త్వరగా సెటిల్‌ అవ్వాలని భావించాడు. నెల్లూరు జిల్లాకు చెందిన మరో వ్యక్తిని కలిసి రూ. 5 లక్షల విలువైన నకిలీ నోట్లను తెచ్చుకున్నాడు.. వీటిని మార్చేందుకు మాస్టర్ ప్లాన్ వేశాడు.

ఈ నకిలీ నోట్లను డబ్బులుగా మార్చుకునేందుకు ఏటీఎంలో ఉండే క్యాష్‌ డిపాజిట్‌ మెషిన్‌లో జమ చేయాలని నిర్ణయించుకున్నాడు. విజయవాడలోని బెంజిసర్కిల్‌ ప్రాంతంలోని యాక్సిస్‌ బ్యాంకు క్యాష్‌ డిపాజిట్‌ మెషిన్‌లో డబ్బులు జమ చేయాలని భావించాడు. ఈనెల 13న ప్రయోగాత్మకంగా రూ. 4,000 తీసుకెళ్లి తన కుటుంబ సభ్యుల అకౌంట్‌కు వీటిని ట్రాన్స్‌ఫర్ చేశాడు. ఈ నకిలీ నోట్లు అకౌంట్‌లో జమ అయితే.. ఆ మొత్తాన్ని డ్రా చేయాలని భావించాడు. ఆ తర్వాత మెల్లిగా దశలవారీగా రూ. 5 లక్షలు ఇదే పద్ధతిలో చేయాలని ప్లాన్ చేసుకున్నాడు. డిపాజిట్‌ మెషిన్ ఆ నోట్లను తీసుకున్నా నకిలీవి కావడంతో అకౌంట్‌లో పడలేదు.

డిపాజిట్ మెషిన్‌లో బ్యాంక్ సిబ్బంది నకిలీ నోట్లు చూసి బ్యాంకు సిబ్బంది షాకయ్యారు. ఈ వ్యవహారం బ్యాంకు నోడల్‌ అధికారి నాలుగు రోజుల క్రితం పటమట పోలీసులకు ఫిర్యాదు ఇచ్చారు. దీంతో పోలీసులు కేసు నమోదు చేసి దర్యాప్తు చేస్తున్నారు. సీసీ కెమెరా ఫుటేజ్, బ్యాంకు అకౌంట్‌ వివరాల ఆధారంగా నిందితుడిని అదుపులోకి తీసుకున్నారు. ఈ కేసులో ప్రమేయం ఉన్న మరికొందరి గురించి ఆరా తీస్తున్నారు. రెండు జిల్లాల్లో వీరి కోసం గాలిస్తున్నారు.