ఆ తొలి మంకీ పాక్స్ రోగి కోలుకొన్నాడు

సంకల్ప బలం దేనినైనా జేయించేలా చేస్తుంది.  ఇదిలావుంటే ఢిల్లీలో తొలి మంకీపాక్స్ పేషంట్ ఆస్పత్రి నుంచి డిశ్చార్జ్ అయ్యాడు. 25 రోజుల చికిత్స తర్వాత అతడు పూర్తిగా కోలుకొని సంపూర్ణ ఆరోగ్యంతో ఇంటికి తిరిగెళ్లాడు. ప్రస్తుతం అతడిలో మంకీపాక్స్‌కు సంబంధించిన ఎలాంటి లక్షణాలు లేవని ఎల్ఎన్ జేపీ ఆస్పత్రి వైద్యులు వెల్లడించారు. దీన్ని తమ ఆస్పత్రి సాధించిన గొప్ప విజయంగా ఎండీ డాక్టర్ సురేశ్ కుమార్ అభివర్ణించారు. ‘మా వైద్యులు రాత్రి పగలు కష్టపడి చికిత్స అందించి రోగిని కోలుకునేలా చేశారు. మంకీపాక్స్ ఇన్‌ఫెక్షన్ చికిత్సలో పాల్గొన్న మా వైద్యుల బృందానికి అభినందనలు’ అని ఆయన అన్నారు.

ఢిల్లీకి చెందిన 34 ఏళ్ల ఓ వ్యక్తి జూలైలో మంకీపాక్స్ లక్షణాలతో ఆస్పత్రిలో అడ్మిట్ అయ్యారు. ఆయనకు పరీక్షల్లో పాజిటివ్‌గా నిర్ధారణ అయ్యింది. దేశ రాజధాని ఢిల్లీలో ఇది తొలి మంకీపాక్స్‌ కేసుగా నమోదైంది. అతడిని ఎల్ఎన్ జేపీ ఆస్పత్రికి తరలించి చికిత్స అందించారు. మంకీపాక్స్ వైరస్ చికిత్సకు ఢిల్లీలో ఇది నోడల్ ఆస్పత్రిగా ఉంది.

విదేశాలకు వెళ్లొచ్చిన ఎలాంటి ట్రావెల్ హిస్టరీ లేకుండానే సదరు వ్యక్తి మంకీపాక్స్ వైరస్ బారిన పడటం గమనార్హం. అయితే, అనారోగ్యానికి గురవడానికి ముందు ఆయన హిమాచల్ ప్రదేశ్‌లోని మనాలీ పర్యటనకు వెళ్లొచ్చారు. అక్కడ మంకీపాక్స్ సోకిన వ్యక్తితో సన్నిహితంగా మెలగడం వల్ల వైరస్ బారిన పడి ఉంటాడని అనుమానిస్తున్నారు. అక్కడి అధికారులను సైతం అప్రమత్తం చేశారు. సదరు వ్యక్తి అనారోగ్యానికి గురవడానికి కారణం మంకీపాక్స్ అని ఆలస్యంగా గుర్తించారు. మంకీపాక్స్‌గా నిర్ధారణ అయిన తర్వాత 11 రోజుల పాటు ఆస్పత్రిలో అడ్మిట్ చేసి చికిత్స కొనసాగించారు. పూర్తిగా కోలుకోవడంతో సోమవారం (ఆగస్టు 1) డిశ్చార్జ్ చేశారు.

మంకీపాక్స్ వైరస్ పట్ల పెద్దగా ఆందోళన చెందాల్సిన పనిలేదని, కొవిడ్ వైరస్ తరహాలో ఇది ప్రాణాంతకం కాదని వైద్య నిపుణులు చెబుతున్నారు. లక్షణాలను త్వరగా గుర్తించి, తగిన చికిత్స అందిస్తే కోలుకుంటారని వివరిస్తున్నారు. లక్షణాలను గుర్తించడంలో జాప్యం జరిగితే, ఇతర అనారోగ్య సమస్యలు ఉన్న సందర్భాల్లో మరణాలు సంభవించే ప్రమాదం ఉందని చెబుతున్నారు. కేరళలో మంకీపాక్స్ వైరస్ బారిన పడి ఓ వ్యక్తి మృతి చెందిన వార్త ఆందోళనకు గురి చేస్తున్న నేపథ్యంలో వైద్య నిపుణుల సూచనలు ప్రాధాన్యం సంతరించుకున్నాయి. మరోవైపు.. దేశంలో ఇప్పటివరకు నమోదైన మంకీపాక్స్ కేసుల సంఖ్య 8కి ఎగబాకింది. కేరళలో 5, ఢిల్లీలో 3 నమోదయ్యాయి.