ఆందోళన కలిగిస్తున్న చైనా తీరు

ప్రస్తుతం చైనా దేశం చేపడుతున్న తీరు భారత్ కు ఆందోళనకు గురిచేస్తోంది. నిరంతరం విస్తరణవాద కాంక్షతో పొరుగు దేశాల భూభాగాల్లోకి చొచ్చుకొచ్చి కయ్యానికి కాలుదువ్వడం చైనాకు వెన్నతో పెట్టిన విద్య. భారత్ విషయంలో డ్రాగన్ మరింత దూకుడుగా వ్యవహరిస్తోంది. సరిహద్దుల్లో గత రెండేళ్లుగా ఇరు దేశాల మధ్య ప్రతిష్టంభన కొనసాగుతోంది. తాజాగా, మరో దుందుడుకు చర్యకు చైనా తెరతీసిందా? అంటే అవుననే సమాధానం వినబడుతోంది. ఈసారి ఏకంగా భారత్‌ ప్రాదేశిక జలాల నుంచి తన నిఘా నౌకను శ్రీలంకకు పంపుతోంది. ‘యువాన్‌ వాంగ్‌ 5’ అనే నౌక శ్రీలంకలోని హంబన్‌టోట నౌకాశ్రయానికి భారత్ మీదుగా వెళ్తుండటం పట్ల ఆందోళన వ్యక్తమవుతోంది. ఆగస్టు 11న హంబన్‌టోటకు చేరుకునే ఈ నౌక.. 17 వరకూ అక్కడే విడిది చేయనుంది.

గంటకు 35.2 కిలోమీటర్ల వేగంతో పయనించే ఈ నిఘా నౌక క్షిపణి, అంతరిక్షం, ఉపగ్రహాల గుర్తించడమే కాదు.. 750 కి.మీపైగా దూరంలోని ప్రాంతాలపై గగనతల నిఘా ఉంచగలదు. ఈ నేపథ్యంలో భారత్‌లోని కల్పకం, కూడంకుళం సహా పలు అణు పరిశోధన కేంద్రాలు దీని పరిధిలోకి వస్తాయి. దీంతోపాటు కేరళ, తమిళనాడు, ఆంధ్రప్రదేశ్‌‌ల్లోని ఆరు ప్రధాన భారతీయ రేవులపై నిఘా ఉంచి.. దక్షిణ భారతంలోని ముఖ్యమైన సంస్థల కీలక సమాచారాన్నీ సేకరించే అవకాశం ఉందని నిపుణులు ఆందోళన చెందుతున్నారు.

శ్రీలంకలో ప్రస్తుతం నెలకున్న తీవ్ర ఆర్థిక సంక్షోభానికి చైనా నుంచి భారీగా తీసుకున్న రుణాలు కూడా ఓ కారణం. లంకను చాలాకాలం నుంచి ఏలుతున్న రాజపక్స కుటుంబం సొంత నగరం హంబన్‌టొట. విదేశీ నౌకలు అంతంత మాత్రంగా వెళ్లే ఈ నగరంలో చైనా నుంచి భారీగా రుణాలు తీసుకుని పోర్టును నిర్మించారు. పీకల్లోతు ఆర్థిక సంక్షోభంలో కూరుకుపోయిన శ్రీలంక.. బీజింగ్ నుంచి తీసుకున్న రుణాలను తిరిగి చెల్లించలేక హంబన్‌బొట నౌకాశ్రయాన్ని చైనా మర్చంట్ పోర్ట్ హోల్డింగ్స్‌కు లీజుకు ఇచ్చింది. దీంతో తన సైనిక అవసరాల కోసం ఈ పోర్టును చైనా వినియోగించుకునే అవకాశముందనే ఆందోళనలు మొదలయ్యాయి. 2014లో కొలంబో పోర్టులో చైనా ఉంచిన జలాంతర్గామి కంటే.. ఈ నౌక మరింత శక్తిమంతమైందిగా భావిస్తున్నారు.

శ్రీలంక కన్సల్టింగ్ సంస్థ తన వెబ్‌సైట్‌లో అప్‌లోడ్ చేసిన వివరాల ప్రకారం.. ‘‘ఇది ఒక వారం పాటు హంబన్‌టోటలో ఉంటుంది.. ఆగస్టు, సెప్టెంబర్ వరకు హిందూ మహాసముద్ర ప్రాంతంలోని వాయువ్య భాగంలో అంతరిక్షం, ఉపగ్రహ నియంత్రణ, పరిశోధన ట్రాకింగ్‌లను నిర్వహిస్తుంది’’ అని తెలిపింది. విదేశీ రక్షణ రంగ నిపుణుల ప్రకారం.. చైనా అత్యాధునిక నిఘా నౌకల్లో యువాన్ వాంగ్ 5 ఒకటి. చైనా పీపుల్స్ లిబరేషన్ ఆర్మీ చెందిన వ్యూహాత్మక విభాగం యువాన్ వాంగ్ నౌకను ఆపరేట్ చేస్తోందని ఇటీవల అమెరికా రక్షణ విభాగం పెంటగాన్  విడుదల చేసిన వార్షిక నివేదిక సైతం వెల్లడించింది.