ఔను ధరలు తగ్గనున్నాయి..కారు కొన్నాళ్లన్న మీ కల సాకారం చేసుకోండి

కార్ల ధరలు తగ్గనున్నాయి. ఔను మీరు విన్నది నిజమే. కొత్త కారు కొనుగోలు చేయాలని అనుకుంటున్నారా..? అయితే ఇదే సరియైన సమయం. ఎందుకంటే కారు కంపెనీలు పండగ డిస్కౌంట్ ఆఫర్లతో భారీ తగ్గింపును ప్రకటించేందుకు సిద్ధమవుతున్నాయి. ఇప్పటికే కొన్ని మోడల్స్‌పై డిస్కౌంట్లను అందుబాటులోకి కూడా తెచ్చాయి. అంతేకాక డీలర్‌షిప్‌ల వద్ద ఎక్కువ స్టాక్స్ ఉంచేందుకు అవుట్‌పుట్‌ను కూడా పెంచుతున్నాయి. మారుతీ సుజుకి ఇండియా తాజాగా వెల్లడించిన డేటాలో.. కంపెనీ వద్ద మొత్తం ఇన్వెంటరీ ప్రస్తుతం 2,12,000కి పెరిగింది. ఈ ఇన్వెంటరీ ఏడాది ప్రారంభంలో 1,20,000లుగా ఉంది. స్టాక్స్ ఎక్కువగా ఉండటం ఉత్పత్తి మెరుగుపడిందనే దానికి సంకేతంగా ఉంది. కానీ కొన్ని ప్రత్యేక మోడల్స్‌కి మాత్రం డిమాండ్ కంటిన్యూగా పెరుగుతూ ఉంది. దీంతో ప్రస్తుతం ఈ మోడల్స్ ప్రొడక్షన్‌ను కంపెనీ చేపట్టాల్సి ఉంది.

ఎంట్రీ లెవల్, తక్కువ పాపులర్ ఉన్న మోడల్స్ ఇన్వెంటరీని తగ్గించుకునేందుకు కంపెనీలు కొన్ని బ్రాండ్లపై భారీ తగ్గింపును ఇప్పటికే ప్రకటించాయి. కంపెనీలు ఏయే కారుపై ఎంత డిస్కౌంట్‌ను అందుబాటులో ఉంచాయో మనం ఒకసారి చూద్దాం.. మారుతీ సుజుకి ఎస్-ప్రెస్సో, సెలెరియో, స్విఫ్ట్ ఏజీఎస్, వీఎక్స్ఐ మోడల్స్‌పై... రూ.9 వేల నుంచి రూ.64 వేల దాకా తగ్గింపు. హ్యుండాయ్ శాంట్రో, ఔరా,నియోస్, ఎక్స్‌సెంట్ ప్రైమ్ మోడల్స్‌పై.. రూ.13 వేల నుంచి రూ.50 వేలు తగ్గింపు. టాటా మోటార్స్ టిగోర్, టియాగో, హ్యారియర్, సఫారి కార్లపై.. రూ.20 వేల నుంచి రూ.40 వేలు డిస్కౌంట్లు, టయోటా అర్బన్ క్రూయిజర్.. రూ.40 వేల నుంచి రూ.75 వేలు వరకు తగ్గింపు, రెనాల్ట్ క్విడ్, ట్రైబర్‌పై.. రూ.10 వేల నుంచి రూ.20 వేలు తగ్గింపు, మహింద్రా బొలెరో, ఎక్స్‌యూవీ బేస్ వేరియంట్లపై.. రూ.10 వేల నుంచి రూ.20 వేలు తగ్గింపు ఇచ్చింది.

డిమాండ్ విధానాలకు అనుగుణంగా వెహికిల్స్ తయారీ చేపట్టడం మారుతీ సుజుకి వంటి ఇతర ఆటో కంపెనీలకు ప్రస్తుతం సవాలుగా ఉంది. చాలా బుకింగ్స్ పెండింగ్‌లో ఉన్నాయి. ఇదే సమయంలో రిటైల్ సేల్స్ కంటే హోల్‌సేల్స్ పెరుగుతున్నాయి. అసలైన డిమాండ్‌ను ఉత్పత్తి అందుకోలేని సమయంలో మాత్రమే ఇది ఏర్పరుడుతుంది. డిమాండ్‌ను మించి సప్లయి పెరిగితే.. ఈ పండగ సీజన్‌లో భారీ డిస్కౌంట్లను మీరు అంచనావేయొచ్చని మారుతీ సుజుకి శశాంక్ శ్రీవాస్తవ తెలిపారు. ఈ ఏడాది బలమైన పండగ సేల్స్‌ను చూస్తామని ఆటో కంపెనీలు ఆశాభావం వ్యక్తం చేస్తున్నాయి. డిమాండ్ అవుట్‌లుక్ బాగుందని తెలిపారు.