ఆ గ్రామమంతా హిందూవులే...అయినా ఘనంగా మొహర్రం

హిందూ, ముస్లింలు కలసి చేసుకొనే పండుగా మొహర్రం. కానీ ఆ గ్రామంలో ఉండేవారంతా హిందూవులే. అయితే ఏమిటీ ఘనంగా మొహర్రం కూడా వారు నిర్వహిస్తారు. మొహర్రం అంటే ముస్లింలకు ఎంతో ప్రధానమని అందరికి తెలుసు. కానీ ఒక గ్రామంలో హిందువులే ఈ పండుగను భక్తి శ్రద్ధలతో చేసుకుంటారు. కొన్ని దశాబ్దాలుగా సాగుతున్న ఆ ఆచారం ఈ ఏడాది కూడా కొనసాగింది. కర్ణాటకలోని బెలగావి జిల్లాలోని సౌందట్టి తాలూకాలోని హిరేబిదనూర్ గ్రామంలోని హిందువులు మొహర్రం పండుగను ఘనంగా జరుపుకున్నారు.

ఒక్క ముస్లిం కుటుంబం కూడా లేని ఆ హిరేబిదనూర్‌లో హిందువులు ఎంతో భక్తి శ్రద్ధలతో ఐదు రోజుల పాటు ఘనంగా మొహర్రం పండుగను చేసుకుంటారు. ఆ ఊర్లో అందరూ హిందువులే ఉంటారు. మొహర్రం సందర్భంగా ఆ గ్రామంలో వీధులన్నీ మంచి లైటింగ్‌తో దగదగలాడిపోతుంటాయి. అక్కడో మసీదు ఉంది. దానిని ఫకీరేశ్వర స్వామి మసీదు అని పిలుస్తారు. అందులో ఓ హిందూ పూజారే హిందూ సంప్రదాయ పద్ధతిలో మతపరమైన కార్యక్రమాలను నిర్వహిస్తారు. గ్రామస్థులు ప్రార్థనలు చేస్తుంటారు.

అయితే ప్రతి ఏడాది మొహర్రం సమయంలో ఆ పూజారి సమీపంలో గ్రామం నుంచి ఒక మౌల్వీని అంటే ముస్లిం బోధకుడిని ఆహ్వానిస్తారు. అతనికి ఒక వారం పాటు మసీదులోనే వసతి కల్పిస్తారు. మొహర్రం నెల మొదటి వారంలో సంప్రదాయ ఇస్లామిక్ పద్ధతిలో మౌల్వీ ద్వారా ప్రార్థనలు చేయించడం ఆనవాయితీ. అంతేకాదు మొహర్రం సందర్భంగా సంప్రదాయ కర్బలా నృత్యం, రోప్ ఆర్ట్, ఫైర్ వాక్‌ల కోసం ప్రదర్శకులను ఆహ్వానిస్తుంటారు. ఇంకో విషయం ఏమిటంటే ఆ మసీదు భవనాన్ని పునరుద్ధరించేందుకు ఇటీవల ఆ ప్రాంత ఎమ్మెల్యే రూ.8 లక్షలు మంజూరు చేశారు. 3,000 మంది జనాభా ఉండే ఆ గ్రామంలో ఎక్కువగా కురుబ, వాల్మీకి వర్గాలకు చెందిన ప్రజలు ఉంటున్నారు.