అట్టారీ-వాఘా సరిహద్దుల్లో...ఘనంగా బీటింగ్ రీట్రిట్ వేడుకలు

ఎపుడూ తుపాకులు దూసుకొనే పాకిస్తాన్, భారతదేశ సైనికులు చేతులు కలిపారు. వారి వారి సరిహద్దుల్లో సైనికులు కవాతు నిర్వహించారు. ఇదిలావుంటే దేశవ్యాప్తంగా భారత స్వతంత్ర దినోత్సవం ఘనంగా జరిగింది. ఇందులో భాగంగా పంజాబ్‌లోని అమృత్‌సర్‌లోని అట్టారీ-వాఘా సరిహద్దుల్లో బీటింగ్ రీట్రిట్ వేడుకలను నిర్వహించారు. ఈ మేరకు భారత్, పాకిస్థాన్ సైనికులు కవాతు చేశారు. ఇరు దేశాల సైనికులు చేతులు కలుపుకున్నారు. ఈ కార్యక్రమాన్ని వీక్షించేందుకు పెద్ద ఎత్తున జనం తరలి వచ్చారు.

స్వతంత్ర దినోత్సవాన్ని పురస్కరించుకుని సోమవారం సాయంత్రం జరిగిన ఈ వేడుకల్లో పాక్‌ రేంజర్లు, బీఎస్‌ఎఫ్‌ జవాన్లు పరస్పరం స్వీట్లు పంచుకున్నారు. ఈ వేడుకల్లో భాగమైన ప్రజలు దేశభక్తి పాటలు పాడుతూ.. నృత్యాలు చేశారు. పెద్దఎత్తున ప్రతి ఒక్కరూ భారత జాతీయ జెండాను ఎగురవేయడంతో అక్కడ పండుగ వాతావరణం నెలకొంది. ఎంతో అట్టహాసంగా ఈ బీటింగ్ రిట్రీట్ కార్యక్రమం జరిగింది. 1959 నుంచి ప్రతి ఏటా ఇరు దేశాల సైనికులు ఈ బీటింగ్‌ రీట్రీట్‌ వేడుకలను నిర్వహిస్తున్నారు.

ఇదిలావుంటే భారతదేశానికి స్వంతంత్రం వచ్చి 75 ఏళ్లు పూర్తైన సందర్భంగా ప్రతి ఇంట త్రివర్ణ పతాకాన్ని ఎగురవేయాలని ప్రధాని పిలుపునిచ్చారు. గత నెలలో ప్రధాని మోదీ హర్ ఘర్ తిరంగా పేరుతో ఈ కార్యక్రమానికి శ్రీకారం చుట్టారు. ఆగస్టు 13 నుంచి 15వ తేదీ వరకు తమ ఇళ్లలో త్రివర్ణ పతాకాన్ని ఎగురవేయాలని ప్రధాని నరేంద్ర మోదీ భారత ప్రజలను కోరారు. ప్రజల హృదయాలలో దేశభక్తి భావనను ప్రేరేపించాలనే ఉద్దేశంతో ఈ కార్యక్రమాన్ని చేపట్టారు. ఈ పిలుపును భారత ప్రజలు అందుకున్నారు. ప్రతి ఇంట మువ్వెన్నల జెండా ఎగిరింది.