నయనతార పెళ్లి అక్కడేనా?

లేడీ సూపర్ స్టార్ నయనతార పెళ్లి మీదే ఇప్పుడు అభిమానుల చూపులు ఉన్నాయి. ప్రముఖ తమిళ దర్శకుడు విఘ్నేష్ శివన్‌తో దాదాపు ఐదేళ్లుగా డేటింగ్‌లో ఉన్నారు నయన్. విఘ్నేష్ తనకు కాబోయే భర్త అని ఓ వేదికపై నయన్ ప్రకటించేశారు కూడా. ఇద్దరూ తరచూ విహారయాత్రలకు వెళుతున్నారు. అక్కడి ఫొటోలను విఘ్నేష్ ఎప్పటికప్పుడు సోషల్ మీడియాలో పోస్ట్ చేస్తున్నారు. ఇటీవల విఘ్నేష్ పుట్టినరోజు సందర్భంగా నయన్ ఘనంగా పార్టీ కూడా ఏర్పాటుచేశారు. కాగా.. ఇప్పుడు వీరిద్దరూ తమ ప్రేమను మరో మెట్టు ముందుకు తీసుకువెళ్లాలనుకుంటున్నారట. డిసెంబర్‌లో పెళ్లి చేసుకోవాలని నిర్ణయించుకున్నట్లు కోలీవుడ్ వర్గాల సమాచారం. వీరి పెళ్లి విదేశాల్లో జరగనున్నట్లు తెలుస్తోంది. ఇండియాలో అయితే అభిమానులు, మీడియా వర్గాల వల్ల ప్రైవసీ ఉండదని డెస్టినేషన్ వెడ్డింగ్‌ను ప్లాన్ చేసుకోవాలని అనుకుంటున్నారట. అయితే ఎక్కడ పెళ్లి చేసుకోబోతున్నారన్న విషయం మాత్రం తెలియరాలేదు. తరచూ నయన్, విఘ్నేష్ విహారయాత్రల నిమిత్తం విదేశాలకు వెళ్లి వస్తుంటారు. వారు వెళ్లిన ప్రదేశాల్లోనే ఎక్కడో ఒక చోట వివాహ బంధంతో ఒకటి కాబోతున్నారట. నయన్ నటించే సినిమాల కంటే పెళ్లి విషయమే ఇప్పుడు హాట్ టాపిక్‌గా మారింది. ఇప్పటికే విఘ్నేశ్ తన ఇంట్లోవారికి నయన్‌ను పరిచయం చేశారు. విఘ్నేశ్ కంటే ముందు నయన్‌ తమిళ నటుడు శింబుతో ప్రేమలో ఉన్నారు. కానీ కొన్ని కారణాల వల్ల వీరు విడిపోయారు. ఆ తర్వాత ప్రముఖ కొరియోగ్రాఫర్, దర్శకుడు ప్రభుదేవాను నయన్ పెళ్లి చేసుకోవాలనుకున్నారు. దాంతో ప్రభుదేవా తన భార్యకు విడాకులు కూడా ఇచ్చేశారు. నయన్ బ్యాంకాక్‌కు వెళ్లి మరీ ప్రభుదేవా పేరును పచ్చబొట్టు వేయించుకున్నారు. అంతా బాగానే ఉందనుకున్న సమయంలో వీరిద్దరి మధ్య ఏం జరిగిందో తెలీదు కానీ బ్రేకప్ అయ్యారు. ప్రభుదేవా టాట్టూను తొలగించుకోవడానికి నయన్ బ్యాంకాక్ వెళ్లారు కూడా. 2015లో వచ్చిన ‘రైడీ ధాన్’ సినిమా సెట్‌లో నయనతార, విఘ్నేశ్ శివన్ కలుసుకున్నారు. ఆ తర్వాత వీరి స్నేహం ప్రేమగా మారింది. వర్క్ పరంగా ప్రస్తుతం నయనతార తమిళంలో ‘నెట్రికాన్’ అనే సినిమాలో నటిస్తున్నారు. ఈ సినిమాకు విఘ్నేశ్ నిర్మాతగా వ్యవహరిస్తు్న్నారు. సినిమాలో నయన్ అంధురాలి పాత్రలో నటించనున్నట్లు తెలుస్తోంది. మరోపక్క నయన్ కథానాయికగా నటించిన ‘సైరా నరసింహారెడ్డి’ సినిమా విడుదలకు సిద్ధంగా ఉంది. సూపర్ స్టార్ రజనీకాంత్‌కు జోడీగా ‘దర్బార్’ సినిమాలో నటిస్తున్నారు. మరోపక్క ప్రముఖ తమిళ నటుడు విజయ్‌కు జోడీగా ‘బిగిల్’ సినిమతోనూ బిజీగా ఉన్నారు.