రకుల్ హిందీ పాట అదిరిందిగా

చిన్న సినిమాతో కెరీర్ మొదలుపెట్టి తక్కువ టైంలోనే అగ్ర హీరోలందరి సరసన పోటీ పడి మరీ అవకాశాలు దక్కించుకున్న రకుల్ ప్రీత్ సింగ్ బాలీవుడ్ వైపు కూడా తన అడుగులు వేస్తోంది. సిద్దార్థ్ మల్హోత్రా సరసన ఆయారీ సినిమాలో నటిస్తోంది రకుల్. నీరజ్ పాండే దర్శకత్వం వహించిన ఈ మూవీపై భారీ అంచనాలు ఉన్నాయి. లే డూబా అనే స్వీట్ మెలోడీని సినిమా యూనిట్ అఫీషియల్ గా రిలీజ్ చేసింది. మంచి లవ్ పెప్పి నెంబర్ గా ఉన్న సాంగ్ ఆల్బమ్ లోనే బెస్ట్ అనిపించేలా ఉంది. ఇద్దరు మిలిటరీ ఆఫీసర్ల మధ్య క్లాష్ ని నేపధ్యంగా తీసుకుని దర్శకుడు నీరజ్ పాండే చాలా కొత్త తరహాలో దీన్ని తెరకెక్కించాడు అనే టాక్ ఇప్పటికే బాలీవుడ్ మీడియాలో జోరుగా ఉంది. దానికి తగ్గట్టు ట్రైలర్ విడుదలైన కొద్ది రోజుల్లోనే పది మిలియన్ల వ్యూస్ దాటేసి సినిమాపై ఆడియన్స్ కున్న ఆసక్తిని బయటపెట్టింది.

సునిధి చౌహన్ రోచక్ కోహ్లీ మనోజ్ ముంతాషీర్ పాడిన ఈ పాట యూత్ కు బాగా కనెక్ట్ అయ్యేలా ఉంది. ఈ సినిమాతో తన బాలీవుడ్ లాంచ్ పర్ఫెక్ట్ గా ఉంటుందనే కాన్ఫిడెన్స్ తో ఉంది రకుల్. సిద్దార్థ్ మల్హోత్రాతో కెమిస్ట్రీ కూడా బాగా సెట్ అయినట్టు ఉంది. మోహమాటపడకుండా బోల్డ్ గా నటించినట్టు సీన్స్ చూస్తే అర్థమవుతుంది. అక్షయ్ కుమార్ ప్యాడ్ మ్యాన్ తో జనవరి 26న పోటీ పడుతున్న ఈ సినిమా తెలుగులో కూడా భారీ పోటీ ఎదుర్కోనుంది. ఇది కనక హిట్ అయితే కాజల్ - ఇలియానా తరహాలో రకుల్ కూడా బాలీవుడ్ లో జెండా పాతవచ్చు. రామ్ చరణ్-బోయపాటి కాంబో మూవీలో రకుల్ నే హీరోయిన్ గా తీసుకున్నారు2 అనే వార్త కూడా తాజాగా ప్రచారంలోకి రావడం విశేషం.