ఈ మహానటుడిని మరోసారి గుర్తుచేసుకుందాం...

దర్శకులు రాసుకున్న పొట్ట చెక్కలయ్యే కామెడీ కి మొదట గుర్తొచ్చే రూపం అతడు. థియేటర్ కు వచ్చిన ప్రేక్షకులను సీట్లో కూర్చోకుండా నవ్వించే కామెడీ అతని సొంతం. తాగుబోతు వేషం వేసినా.. దొంగగా ప్రేక్షకుల హృదయాలను దోచుకున్నా.. తెలుగు భాష చచ్చిపోయే పరిస్థితి వస్తే దానికంటే ఒక్కరోజు ముందే చచ్చి పోతానని ఏడిపించే డైలాగులు చెప్పినా ఒక్క అతనికే చెల్లింది. తెలుగు చిత్ర పరిశ్రమలో హాస్య నటుడిగా తనకంటూ ఒక చెరగని ముద్ర వేసుకున్నారు ఎం ఎస్ నారాయణ.

కమెడియన్ ఎం.ఎస్.నారాయణ మరణాన్ని తెలుగు ప్రజలు ఇంకా జీర్ణించుకోలేకపోతున్నారు. 1996లో 'పెదరాయుడు' చిత్రంలో తొలిసారిగా వెండి తెరపై కనిపించారు ఎం.ఎస్ నారాయణ. అయితే అంతుకు ముందే వెగుచుక్క-పగటి చుక్క, ప్రయత్నం, ముగ్గురు మొనగాళ్లు, పేకాట పాపారావు చిత్రాలకు అద్భుతమైన కథలు అందించి సినీ రంగంలో తన స్థానాన్ని సుస్థిరం చేసుకున్నారు. దర్శకుడు రవి రాజ పినిశెట్టితో రుక్మిణీ సినిమా కథ చర్చల్లో ఆయన హావ భావ ప్రదర్శనకు ముగ్దుడై హాస్యనటుడిగా ఎమ్ ధర్మరాజు ఎం. ఏ. అవకాశం కల్పించారు. 1997లో ఈవీవీ దర్శకత్వంలో మా నాన్నకు పెళ్ళి సినిమాలో తాగుబోతు తండ్రి పాత్ర ఆయనకు ఎంతో పేరు తెచ్చిపెట్టింది. దర్శకులు తనకు ఇచ్చిన పాత్రకు తానే సంభాషణ రాసుకుని సినిమాల్లో పలికేవారు.

ఇండస్ట్రీకి వచ్చిన అతికొద్ది కాలంలోనే తనకంటూ ఒక ప్రత్యేక గుర్తింపు తెచ్చుకొని వైవిధ్యమైన పాత్రలు పోషించుకుంటూ అతి కొద్ది కాలం లోనే 700 కు పైగా సినిమాలు చేశారు. ఒకానొక దశలో ఎం.ఎస్ నారాయణ లేకుండా తెలుగు సినిమా విడుదలయ్యేదే కాదంటే అతిశయోక్తి కాదు. దాదాపు రెండు దశాబ్దాల పాటు తన కామెడీతో తెలుగు ప్రజల బాధలను దూరం చేసి.. మనం నవ్వుకోడానికి ఎన్నో జ్ఞాపకాలను వదిలి జనవరి 23, 2015 లో ఆయన మాత్రం కానరాని లోకానికి వెళ్ళిపోయారు. ఆయన ఇప్పుడు మన మధ్య లేకపోయినప్పటికీ అతని అధ్బుత నటన, విలక్షణమైన హావ భావాలతో తెలుగు ప్రేలక్షకుల మదిలో ఎప్పటికి చిర స్థాయిగా నిలిచిపోతారు.

ఎం.ఎస్ నారాయణ వర్ధంతి సందర్భంగా ఒక్కసారి ఆ మహానటుడిని గుర్తుచేసుకుంటూ.. ఎమ్.ఎస్.నారాయణకు పేరు తెచ్చిపెట్టిన కొన్ని సంభాషణలు...

- ఏం చేస్తున్నావ్ ... ఏం చేస్తున్నావ్ ... అని మాటిమాటికీ అడగొద్దు. ఏదో ఒకటి చేసేయగలను (నువ్వు నాకు నచ్చావ్)

- అమ్మా ... నీ కళ్ళేవీ? (నువ్వు నాకు నచ్చావ్)

- షేక్ ఇమామ్ (శివమణి)

- సోడా కొట్టడం అంటే పీజీ పాసైనంత వీజీ కాదు (బన్ని)

- ఇక్కడేం జరుగుతుందో నాకు తెలియాలి..తెలియాలి (అతడు)

ఎమ్మెస్ నారాయణ తన నట జీవితంలో 5 నంది అవార్డులు ( రామసక్కనోడు, మానాన్నకు పెళ్ళి, సర్దుకుపోదాం రండీ, శివమణి, దూకుడు), 2 సినీ గోయెర్స్ అవార్డులు పొందారు. దూకుడు చిత్రానికిగాను ఉత్తమ సహాయనటుడిగా ఫిల్మ్‌ఫేర్ అవార్డును అందుకున్నారు. 200 చిత్రాల్లో తాగుబోతు పాత్రల్లో ఒదిగిపోయారు.