శృతి హాసన్ బర్త్ డే స్పెషల్!

తానొక యాక్టర్.. తానొక సింగర్.. తానొక మ్యూజిక్ డైరెక్టర్.. అంతేకాదు అన్నింటికీ మించి తానొక స్టార్ హీరో కూతురు. ఆమే యూనివర్సల్ హీరో కమల్ హాసన్ కూతురు శృతి హాసన్. త‌ల్లిదండ్ర‌ుల సినీవార‌సత్వాన్ని పుణికిపుచ్చుకొని కష్టపడి సినిమాలు చేసి తనకంటూ నటిగా ఓ గుర్తురింపు తెచ్చుకుంది శృతి హాసన్. ఆమె తెలుగు, తమిళ మరియు హిందీ సినిమాల్లో నటించారు. ఆమె స్టోరీ ఎంచుకుంది అంటే అందులో కంటెంట్ ఉండాల్సిందే...కేరెక్టర్ కి ఇంపార్టెన్స్ ఉండాల్సిందే. అందుకే శ్రీమంతుడు, గబ్బర్ సింగ్, రేసుగుర్రం లాంటి బ్లాక్ బస్టర్ లు ఆమె ఖాతాలో వున్నాయి. శృతి హాసన్ జన్మదినం సందర్భంగా ప్రత్యేక కథనం మీకోసం. 2000లో తన తండ్రి కమల్ హాసన్ దర్శకత్వంలో తెరకెక్కిన "హే రాం" సినిమాలో బాల్యనటిగా నటించిన శ్రుతి హాసన్ ఆ తర్వాత సంగీతానికి సంబంధించిన విషయాలపై శ్రద్ధ చూపింది. 2008లో సోహం షా దర్శకత్వంలో తెరకెక్కిన "లక్" సినిమాలో ఇమ్రాన్ ఖాన్ సరసన నటిగా తొలిసినిమా చేసింది. ఆ సినిమా ఘోరపరాజయాన్ని చవిచూసింది. శ్రుతికి కూడా తన నటనకు విమర్శకుల నుంచి ప్రతికూల స్పందన వచ్చింది. 2011లో కె. రాఘవేంద్రరావు కొడుకైన కె.ప్రకాష్ దర్శకత్వంలో సిద్దార్థ్ సరసన "అనగనగా ఓ ధీరుడు" చిత్రంతో ఎంట్రీ ఇచ్చిన ఈ బ్యూటీ.. మొదటి చిత్రంతోనే ప్లాప్ అందుకుంది. దీంతో అంతా ఐరన్ లెగ్ అంటూ కామెంట్లు చేసినా అవేమీ లెక్క చేయలేదు. తర్వాత పవన్ కళ్యాణ్, హరీష్ శంకర్ ల 'గబ్బర్ సింగ్' చిత్రంతో భారీ హిట్ అందుకుంది. దీంతో ఆమె కాల్ షీట్ల కోసం దర్శకులు క్యూలు కట్టారు.గబ్బర్ సింగ్ తర్వాత ఇక శృతి హాసన్ కి వెనక్కి తిరిగి చూసే పరిస్థితి రాలేదు. తర్వాత రవితేజ తో 'బలుపు', ఎన్టీఆర్ తో 'రామయ్యా వస్తావయ్యా', రాంచరణ్ తో 'ఎవడు', అల్లు అర్జున్ తో 'రేసు గుర్రం', మహేష్ బాబుతో 'శ్రీమంతుడు' వంటి చిత్రాల్లో హీరోయిన్ గా నటించింది. చాలా సంవత్సరాల తర్వాత ప్రస్తుతం ఆమె రవితేజ, గోపీచంద్ మలినేని కాంబినేషన్ లో తెరకెక్కుతోన్న 'క్రాక్' సినిమాలో హీరోయిన్ గా నటిస్తుంది. ఆమె మరెన్నో మంచి సినిమాలు చేయాలని కోరుకుంటూ శృతి హాసన్ ని జన్మదిన శుభాకాంక్షలు.