'హాస్య బ్రహ్మా'నందం బర్త్ డే స్పెషల్!

ఆయన చూపు చాలు బాధలన్నీ మరిచి హాయిగా నవ్వుకోడానికి.. ఆయన పలికించే హావభావాలు చాలు ప్రపంచాన్ని మరిచి హాస్య లోకంలో విహరించడానికి. మూడున్నర దశాబ్దాలుగా తెలుగు ప్రజల పెదాలపై నిరంతరం ఆయన రూపం కనిపిస్తూనే ఉంటుంది. ఆయనే "హాస్య బ్రహ్మ బ్రహ్మానందం". ఇప్పటికే వివిధ భాషల్లో 900కు పైగా సినిమాల్లో నటించి అరుదైన రికార్డును సొంతం చేసుకున్నారాయన. ఫిబ్రవరి 1 బ్రహ్మానందం జన్మదినం సందర్భాన్ని పురస్కరించుకుని ఆయన ప్రస్థానంపై ప్రత్యేక కథనం. హాస్య బ్రహ్మకు అప్పుడే 63 ఏళ్ళు వచ్చేసాయి. అరగుండుగా... ఖాన్‌దాదాగా, కత్తి రాందాసుగా, శంకర్‌దాదా ఆర్‌ఎంపీగా... ఆయన చేసిన పాత్రలు సినీ అభిమానుల మనస్సులో ఎన్నేళ్లయినా చెక్కు చెదరకుండా పదిలంగానే ఉంటాయి. అత్తిలిలో తొమ్మిది సంవత్సరాలు లెక్చరర్‌గా పనిచేశాక సినీరంగంలోకి అడుగుపెట్టాడు బ్రహ్మానందం. బ్రహ్మానందాన్ని మొట్టమొదటి సారిగా మూవీ కెమెరా ముందు మేకప్ వేసి నిలబెట్టినవ్యక్తి దర్శకుడు వేజళ్ల సత్యనారాయణ. 1985లో హైదరాబాద్ వెస్లీ కాలేజీలో మధ్యాహ్నం పన్నెండు గంటలకు హీరో నరేశ్‌తో తీసిన తొలి షాట్ బ్రహ్మానందం నటజీవితానికి శ్రీకారం చుట్టింది. కానీ బ్రహ్మానందం తొలిసారి తెరపై కనిపించింది 'అహనా పెళ్ళంట' చిత్రంలో. ఈ సినిమాకు జంధ్యాల దర్శకత్వం వహించారు.. ఈ చిత్రంలో 'పాడె మీద పైసలు ఏరుకొనే వెధవా... పోతావ్‌ రారేయ్‌.. నాశనమై పోతావు' అంటూ ఆయన చేసిన అరగుండు పాత్ర బ్రహ్మానందాన్ని హాస్య బ్రహ్మగా నిలబెట్టడానికి దోహదపడింది.

నీ యంకమ్మా (చిత్రం భళారే విచిత్రం చిత్త్రంలోని సంభాషణ) పండగ చేసుకో (భిక్షగాడి పాత్ర ఆలీతో పోకిరి చిత్రంలో అర్థ రూపాయి దానం చేసి అనే సంభాషణ) రకరకాలుగా ఉంది మాస్టారూ (నువ్వు నాకు నచ్చావ్ చిత్రం), ఖాన్ తో గేమ్స్ ఆడకు... శాల్తీలు లేచిపోతాయి... (మనీ మనీ చిత్రం), దొరికాడా ఏశెయ్యండి... (పట్టుకోండి చూద్దాం), జఫ్ఫా (చాలా చిత్రాలలో) ఇరుకుపాలెం వాళ్లంటే ఏకసెక్కాలుగా ఉందా? (ధర్మచక్రం) నా పెర్ఫార్మెన్స్ మీకు నచినట్లైతే ఎస్సెమ్మెస్ చేయండి (దూకుడు)నన్ను ఇన్వాల్వ్ చేయకండి రావు గారు (ఢీ).... ఇలాంటి బ్రహ్మానందం మాటలు ఎన్నో ప్రజాదరణ పొందాయి. రేలంగి, అల్లు రామలింగయ్య తరువాత 'పద్మశ్రీ' పురస్కారం అందుకున్న తెలుగు హాస్యనటునిగా ఆయన చరిత్ర కెక్కారు... కేవలం 25 ఏళ్ళ కాలంలో 900కి పైగా చిత్రాల్లో నటించి గిన్నిస్ బుక్ ఆఫ్ వరల్డ్ రికార్డ్స్ లోనూ చోటు సంపాదించుకున్నారు... వేయికి పైగా చిత్రాల్లో నవ్వులు పూయించిన బ్రహ్మానందం కామెడీ జనానికి మొహం మొత్తడం లేదు... రోజురోజుకూ బ్రహ్మీ కామెడీకి క్రేజ్ పెరుగుతూనే ఉంది. తెలుగు చిత్రసీమలో హాస్యబ్రహ్మగా ముద్రపడిన బ్రహ్మానందం మరిన్ని సినిమాల్లో తన ప్రతిభాపాటవాలను కనబరిచి ప్రేక్షకులకు గిలిగింతలు పెట్టాలని ఆశిద్దాం.