స్టార్ హీరోల స‌ర‌స‌న మ‌ళ్లీ ఎప్పుడో

దాదాపు పుష్కరకాలం హీరోయిన్‌గా ఓ వెలుగువెలిగిన మిల్క్‌బ్యూటి తమన్నాకు ఇప్పుడు సినిమాలు సన్నగిల్లకపోయినా…స్టార్‌ హీరోల సరసన సినిమాలు లేకపోవడమే హాట్‌టాపిక్‌ అయ్యింది. తెలుగు సినిమాల ద్వారానే బాగా ఫోకస్‌ అయిన ఆమె మొదట్నుంచి తమిళంలోను, ఆ తర్వాత హిందీలోనూ సినిమాలు చేయడం మొదలుపెట్టిన సంగతి తెలియంది కాదు. వివిధ భాషల్లో సినిమాలు చేసినా కాల్షిdట్లను జాగ్రత్తగా సర్దుబాటు చేసుకుంటూ తాను అంగీకరించిన సినిమాల విషయంలో ఎక్కడా వివాదాలకు తావు లేకుండా ఆమె కెరీర్‌ను కొనసాగిస్తూ వస్తోంది. ప్రస్తుతం తెలుగులో కల్యాణ్‌రామ్‌ సరసన నా నువ్వే చిత్రంలో నటిస్తున్న ఆమె మరోవైపు కునాల్‌ కోహ్లీ దర్శకత్వంలో సందీప్‌కిషన్‌ సరసన ఓ చిత్రం చేస్తోంది.

ఈ రెండు చిత్రాలు కాకుండా హిందీ క్వీన్‌ తెలుగు రీమేక్‌లో నటిస్తోంది. తన కెరీర్‌లో అభినేత్రి చిత్రాన్ని మినహాయిస్తే…హీరోయిన్‌ ఓరియెంటెడ్‌ చిత్రాలు చేసింది ఆమె తక్కువే. అభినేత్రి చిత్రం తన అంచనాలను వమ్ము చేయడంతో ఇప్పుడామె క్వీన్‌ చిత్రంపై ఎన్నో ఆశలతో ఉంది. అలాగే మిగిలిన రెండు చిత్రాలు కూడా టాలీవుడ్‌లో తన కెరీర్‌ను మలుపు తిప్పేవేనని ఆమె భరోసాతో ఉంది. ఇదిలావుండగా…తమిళంలో ఉదయనిధిస్టాలిన్‌ కథానాయకుడిగా శీను రామసామి దర్శకత్వంలో రూపొందుతున్న కన్నెకలై మానె అనే తమిళ చిత్రంలో కూడా తమన్నా కథానాయికగా నటిస్తోంది. ఇటీవల వచ్చిన తమిళ స్కెచ్‌ చిత్రం అటు తమిళంలోనూ, ఇటు తెలుగలోనూ నిరాశనే మిగిల్చింది. ఇక బాలీవుడ్‌లో చక్రి తోలేటి దర్శకత్వంలో కామోషి చిత్రంలోనూ, మరాఠీలో ఎ.బి.సి. అనే చిత్రంలోనూ ఆమె నటిస్తోంది. మొత్తంమీద నాలుగు భాషల్లో కలుపుకుని అరడజను చిత్రాలు ఆమె చేతిలో ఉన్నాయి. తప్పకుండా ఇవి తనకు పూర్వవైభవం తెచ్చిపెట్టే చిత్రాలేనని తమన్నా దృఢ విశ్వాసంతో ఉందట.