లేడీ ఓరియంటెడ్ చిత్రాలకు కేరాఫ్ అడ్రస్.. విజయశాంతి
cinema | Suryaa Desk | Published : Thu, Jun 25, 2020, 02:49 PM
లేడీ ఓరియంటెడ్ చిత్రాలకు కేరాఫ్ అడ్రస్.. విజయశాంతి పుట్టినరోజు నేడు. 1966 జూన్ 24న జన్మించిన విజయశాంతి.. తన పిన్ని విజయలలిత వారసత్వంతో ఏడేళ్ల వయసులోనే బాల నటిగా ఇండస్ట్రీలో అడుగుపెట్టింది. సూపర్ స్టార్ కృష్ణ నటించిన ‘కిలాడీ కృష్ణుడు’తో హీరోయిన్గా తెరంగేట్రం చేసిన విజయశాంతి ఆ తరువాత వెనుతిరిగి చూసుకోకుండా వరుస చిత్రాల్లో నటించింది.అత్యధిక హీరోయిన్ ఓరియంటెడ్ చిత్రాలతో ట్రెండ్ క్రియేట్ చేసిన విజయశాంతి.. 30 సంవత్సరాల సినీ ప్రస్థానంలో సుమారు 180 సినిమాలకు పైగా నటించింది. స్టార్ హీరోయిన్ హోదా దక్కించుకుంది. మెగాస్టార్ చిరంజీవి-విజయశాంతి హిట్ కాంబినేషన్లో పలు విజయవంతమైన చిత్రాలు నేటికీ తెలుగు ప్రేక్షకుల్ని అలరిస్తూనే ఉన్నాయి. మెగాస్టార్తో కలిసి 19 చిత్రాల్లో కథానాయికగా నటించిన విజయశాంతి, బాలకృష్ణతో 17 చిత్రాల్లో నటించింది. కృష్ణ, వెంకటేష్, నాగార్జున ఇంకా టాలీవుడ్ టాప్ హీరోలందరితో నటించింది. అగ్నిపర్వతం, స్వయంకృషి, ప్రతిఘటన, జానకిరాముడు, లారీ డ్రైవర్, చినరాయుడు, గ్యాంగ్ లీడర్, కర్తవ్యం, కొండవీటి దొంగ, ఒసేయ్ రాములమ్మ, పసివాడిప్రాణం తదితర చిత్రాలు ఆమెకు ఎనలేని గుర్తింపును తెచ్చిపెట్టాయి.1991లో ‘కర్తవ్యం’ సినిమాలో నటనకు గానూ జాతీయ సినిమా ఉత్తమ నటి పురస్కారాన్ని అందుకుంది. 2006లో వచ్చిన ‘నాయుడమ్మ’ సినిమా తర్వాత కొన్నాళ్ళు నటనకు దూరంగా ఉన్న విజయశాంతి 13 ఏళ్ల విరామం తరువాత మహేష్ బాబు ‘సరిలేరు నీకెవ్వరు’ చిత్రంలో తల్లి పాత్రలో కనిపించారు.
|
|