తన గొప్ప మనసు మరోసారి చాటుకున్న సోనూసూద్..

గత మూడున్నర నెలలుగా కరోనా మహమ్మారి దెబ్బకు ప్రపంచ దేశాలు అన్ని కూడా వణికిపోతున్నాయి. మరోవైపు మిగతా ఇతర దేశాల మాదిరిగా మన దేశాన్ని కూడా మొన్నటి వరకు లాక్ డౌన్ చేసిన కేంద్రం, ఇటీవల పలు ప్రాంతాల్లో వాటిని సరళించింది. అయితే ఆ సమయంలో ఎన్నో రంగాలు పూర్తిగా నష్టాల్లో కూరుకుపోవడంతో పాటు, కోట్లాది మంది ప్రజలకు సరైన ఉపాధి లేక నానా అవస్థలు పడుతున్నారు. దిగువ వర్గాల వారి పరిస్థితి అయితే వర్ణనాతీతం అనే చెప్పాలి. అటువంటి వారిని ఆదుకోవడానికి ఇప్పటికే కేంద్ర, రాష్ట్ర ప్రభుత్వాలు కొంత సాయం ప్రకటించడంతో పాటు, పలు రంగాలకు చెందిన ప్రముఖులు, తమకు వీలైనంతలో విరాళాలు కూడా ఇస్తున్న విషయం తెలిసిందే. అయితే మిగతా దేశాలతో పోలిస్తే మన దేశంలో అత్యధిక జనాభా కారణంగా ఇంకా అనేకమంది అవస్థలు పడుతూనే ఉన్నారు.

ఇక ఇటీవల ప్రముఖ నటుడు సోను సూద్, కరోనా కారణంగా నష్టపోయిన వారికి తనకు వీలైనంతలో భోజనం, వసతి, నిత్యాసరాలు వంటివి అందిస్తూ వస్తున్నారు. ఇటీవల ముంబైలోని తన హోటల్స్ ని పలువురు హెల్త్ కెర్ వర్కర్స్ ఉచితంగా వినియోగించుకునేందుకు అవకాశం కల్పించి తన గొప్ప మనసును చాటుకున్నారు సోను సూద్. అలానే ఇటీవల పలువురు వలస కార్మికులను తమ తమ సొంత ప్రాంతాలకు పంపించేందుకు ఉచితంగా రవాణా సౌకర్యం ఏర్పాటు చేసిన సోను, నేడు మరొక కుటుంబాన్ని ఆదుకోవడానికి సిద్ధమయ్యారు.

చిత్తూరు జిల్లా మదనపల్లె లోని ఒక రైతు, తన పొలంలో పని చేయడానికి ఎద్దులు లేక, కూలీలకు డబ్బులు ఇవ్వలేక, తన సొంత కూతుళ్ళని కాడెద్దులుగా మార్చి, తన భార్యతో విత్తనాలు వేయిస్తూ పని చేస్తున్న వీడియో ప్రస్తుతం పలు సోషల్ మీడియా మాధ్యమాల్లో వైరల్ అవుతుండగా, ఆ వీడియో చూసి ఎంతో చలించిపోయిన సోను సూద్, ఆ రైతు కష్టం మరెవ్వరికీ రాకూడదు, వారికి ఎద్దుల కంటే ట్రాక్టర్ అయితే మరింత సులువుగా ఉంటుంది, రేపు ఉదయానికల్లా వారి ఇంటికి కొత్త ట్రాక్టర్ వస్తుంది, ఇకపై కన్న కూతుళ్ల చదువుల పై వారిని దృష్టి పెట్టమనండి అంటూ తన సోషల్ మీడియా మాధ్యమం ట్విట్టర్ లో పోస్ట్ పెట్టారు. ఇప్పటికే ఎందరినో ఈ కరోనా సమయంలో ఆదుకుంటున్న సోను సూద్, నేడు చేసిన ఈ మరొక గొప్ప పనికిగాను, ఆయన పై పలువురు ప్రజలు పొగడ్తలు, ప్రశంసలు కురిపిస్తున్నారు....!!