మూవీ రివ్యూ: 'దృశ్యం-2'
cinema | Suryaa Desk | Published : Fri, Nov 26, 2021, 12:09 PM
2014లో వచ్చిన ‘దృశ్యం’ సినిమాకు కొనసాగింపుగా తెరకెక్కిన ‘దృశ్యం2’ సినిమా ఓటీటీలో విడుదలైంది. కథలోకి వెళ్తే.. వరుణ్ కనిపించకుండా పోయిన కేసు నుంచి బయటపడిన రాంబాబు (వెంకటేశ్) కుటుంబం ఇప్పటికీ ఆ కేసు తాలూకు భయాలతో బాధపడుతుంటుంది. కేబుల్ టీవీ ఆపరేటర్ స్థాయి నుంచి థియేటర్ ఓనర్ గా, ఓ సినిమాను నిర్మించే స్థాయికి రాంబాబు ఎదుగుతాడు. ఐజీ గౌతమ్ సాహూ(సంపత్ రాజ్) ఆ కేసును రీఓపెన్ చేస్తాడు. మరి వరుణ్ కేసు విషయంలో ఐజీకి దొరికిన ఆధారాలేంటి? అప్పుడు రాంబాబు ఏం చేశాడు? కేసు రీఓపెన్తో రాంబాబు భార్య, పిల్లలు ఎలాంటి పరిస్థితులు ఎదుర్కొన్నారు? ఈ కేసు నుంచి బయటపడ్డారా? అనేది సినిమాలో చూడాలి.
ప్రేక్షకుడి అంచనాలకు ఏమాత్రం తగ్గకుండా కథ, కథనాలు ఉన్నాయి. దర్శకుడు జీతూ జోసెఫ్ తెలుగు ప్రేక్షకులకు కనెక్ట్ అయ్యేలా ఫ్రెష్లుక్ తో సినిమాను తీర్చిదిద్దాడు. ఒరిజినల్ సినిమాతో పోలిస్తే స్వల్ప మార్పులు చేశారు. వరుణ్ కేసును పోలీస్శాఖ సీక్రెట్గా ఇన్వెస్టిగేట్ చేస్తున్నట్లు తెలియడంతో ప్రేక్షకుడిలో ఉత్కంఠ మొదలవుతుంది. అక్కడ దర్శకుడు ఇచ్చిన ట్విస్ట్ను ఎవరూ ఊహించరు. హత్య జరిగిన తర్వాత రాంబాబు ఏం చేశాడన్న దానిపై పోలీసుశాఖ విచారణ మొదలుపెడుతుంది. పోలీసుల నుంచి తప్పించుకోవడానికి రాంబాబు వేసే ఎత్తులు, పైఎత్తులతో ఉత్కంఠతో సినిమా సాగిపోతుంటుంది. కోర్టు సన్నివేశాలన్నీ అలరిస్తాయి. వరుస ఆసక్తికర సన్నివేశాలతో కథనం పరుగులు పెడుతుంది. ఒక మంచి థ్రిల్లర్ను చూశామన్న ఫీలింగ్ కలుగుతుంది. వెంకటేశ్, మీనా, వారి కుమార్తెలుగా కృతిక, ఏస్తర్లు తమ పరిధి మేరకు నటించారు. మొదటి భాగంలో లేని కొన్ని పాత్రలు ఇందులో వచ్చాయి. ఐజీగా సంపత్రాజ్, కానిస్టేబుల్గా సత్యం రాజేశ్, రచయితగా తనికెళ్ల భరణి, లాయర్ గా పూర్ణ కీలక పాత్రల్లో నటించి మెప్పించారు. అనూప్ రూబెన్స్ నేపథ్య సంగీతం, మార్తాండ్ కె వెంకటేశ్ ఎడిటింగ్ బాగుంది. దర్శకుడు జీతూ జోసెఫ్ సెకండ్ హాఫ్ లో కథ, కథనాలను పరుగులు పెట్టించిన విధానం మెప్పిస్తుంది.
ప్లస్ పాయింట్స్
- స్టోరీ, స్క్రీన్ ప్లే
- వెంకటేశ్ నటన
- డైరెక్షన్
మైనస్ పాయింట్స్
- ఫస్ట్ హాఫ్ లో కొన్ని సాగదీత సీన్లు
|
|