నాలుగోసారి పోటీకి ట్రంప్ సిద్ధం.. కానీ రేటింగ్ రివర్స్

అమెరికా అధ్యక్షుడు డొనాల్డ్ ట్రంప్‌ నాలుగోసారి అధ్యక్ష పదవికి పోటీ చేయాలనే తన ఆలోచనను వ్యక్తం చేస్తూ చర్చకు తెరలేపారు. తన సొంత సామాజిక మాధ్యమం ట్రూత్ సోషల్‌లో ‘రికార్డ్ నంబర్లు అన్ని చోట్లా ఉన్నాయి! నేను నాలుగోసారి ప్రయత్నించాలా?’ అని రిపబ్లికన్ నేత డొనాల్డ్ ట్రంప్ పోస్ట్ పెట్టారు. గతంలోనూ ట్రంప్ ఇలాంటి పోస్ట్‌లు చేయడం గమనార్హం. గతేడాది నవంబర్‌లో ‘TRUMP 2028, YES!’ అని రాసి ఉన్న ఫోటోను.. అంతకు ముందు సెప్టెంబర్‌లో డెమొక్రాటిక్ నాయకులతో సమావేశంలో ‘Trump 2028’ టోపీల ఫోటోలను పంచుకున్నారు. ట్రంప్ తన 2020 ఎన్నికల ఓటమిని రెండో టర్మ్‌గా పరిగణిస్తున్నట్లు కనిపిస్తోంది.

అయితే, అమెరికా రాజ్యాంగంలోని 22వ సవరణ ప్రకారం... ఏ వ్యక్తి కూడా అధ్యక్ష పదవికి రెండుసార్లకు మించి ఎన్నిక కాలేరు. ట్రంప్ 2017లో మొదటిసారి అధ్యక్షుడయ్యారు, అంటే ఆయన ఇప్పటికే ఒక పూర్తి టర్మ్ పూర్తి చేసుకున్నారు. ‘రికార్డ్ నంబర్లు అన్ని చోట్లా ఉన్నాయి’ అని ట్రంప్ చెబుతున్నప్పటికీ, తాజా సర్వేలు ఆయన పాపులారిటీ తగ్గుతున్నట్టు సూచిస్తున్నాయి. జనవరి 8-11 మధ్య జరిగిన AP-NORC సర్వే ప్రకారం, సుమారు 40% మంది ఆయన పనితీరును ఆమోదిస్తున్నారు. సగం మంది ఆయన అమోదయోగ్యం కాని ప్రాధాన్యతలపై దృష్టి పెడుతున్నారని, 20% మంది సరైన ప్రాధాన్యతలపై దృష్టి పెడుతున్నారని, మరో 20% మంది మిశ్రమంగా ఉన్నారని, 14% మంది ఎలాంటి అభిప్రాయం లేదని తెలిపారు.

ఆర్థిక వ్యవస్థ విషయానికొస్తే కేవలం 37% మంది ఆయన ఆర్థిక నిర్వహణను ఆమోదిస్తున్నారు. ఇది డిసెంబర్‌లో 31%తో పోల్చితే స్వల్పంగా పెరిగింది. 60% మంది ఆయన రెండో టర్మ్‌లో జీవన వ్యయాన్ని పెంచారని, 20% మంది సహాయం చేశారని, నాలుగోవంతు మంది ఎటువంటి మార్పు లేదని చెప్పారు. వలసలు, విదేశాంగ విధానంపై కేవలం 38% మంది ఆయన విధానాలను ఆమోదిస్తున్నారు, మార్చి 2025లోని 49%తో పోల్చితే తగ్గింది. 60% మంది అమెరికన్లు ఆయన విదేశాంగ విధానాన్ని వ్యతిరేకిస్తున్నారు. 56% మంది అమెరికా సైన్యాన్ని విదేశాలలో ఎక్కువగా ఉపయోగిస్తున్నారని భావిస్తున్నారు.

జనవరి 12-17 మధ్య న్యూయార్క్ టైమ్స్/ సీనా పోల్ ప్రకారం, 40% మంది ట్రంప్‌ను ఆమోదిస్తున్నారు. 42% మంది ఆయన అమెరికా చరిత్రలో చెత్త అధ్యక్షులలో ఒకరిగా నిలుస్తారని, 19% మంది ఉత్తమ అధ్యక్షులలో ఒకరిగా నిలుస్తారని నమ్ముతున్నారు. మూడింట ఒక వంతు కంటే తక్కువ మంది కిందటి ఏడాది కంటే అమెరికా మెరుగ్గా ఉందని నమ్ముతున్నారు. 49% మంది దేశం అధ్వాన్నంగా ఉందని, 32% మంది మెరుగ్గా ఉందని చెప్పారు.

ఖర్చు, ఆర్థిక వ్యవస్థపై 51% మంది ట్రంప్ విధానాలు జీవితాన్ని మరింత ఖరీదైనవిగా మార్చాయని చెప్పారు. కేవలం 32% మంది మాత్రమే ఆర్థిక వ్యవస్థ ఒక సంవత్సరం క్రితం కంటే మెరుగ్గా ఉందని భావిస్తున్నారు. 29% మంది ఆర్థిక వ్యవస్థను మంచి లేదా అద్భుతమైనదిగా పేర్కొన్నారు. ఏప్రిల్ 2025లో 22% నుంచి 29 శాతానికి పెరిగింది.

ప్రాధాన్యతలు, టారిఫ్‌లపై 57% మంది ఆయన తప్పుడు సమస్యలపై దృష్టి పెడుతున్నారని చెప్పారు. 54% మంది విస్తృతమైన టారిఫ్‌లను వ్యతిరేకిస్తున్నారు. ఇందులో 45% మంది తీవ్రంగా వ్యతిరేకిస్తున్నారు. న్యూయార్క్ టైమ్స్/ సీనా పోల్ విడుదలైన తర్వాత, ట్రంప్ న్యూయార్క్ టైమ్స్‌పై దావా వేస్తానని ప్రకటించారు. ‘వారి వామపక్ష తీవ్రవాద అబద్ధాలు, తప్పులకు వారే పూర్తిగా బాధ్యత వహిస్తారు!’ అని ఆయన అన్నారు.