కుటుంబ సభ్యులను పట్టుకునేందుకు.. 5 ఏళ్ల బాలుడిని అరెస్ట్ చేసిన అమెరికా

అగ్రరాజ్యం అమెరికాలో ఇమ్మిగ్రేషన్ ఆంక్షల పేరుతో అధికారులు అనుసరిస్తున్న తీరు మరోసారి వివాదాస్పదంగా మారింది. మిన్నెసోటాలోని కొలంబియా హైట్స్ ప్రాంతంలో 5 ఏళ్ల బాలుడు లియామ్ కొనెజో రామోస్‌ను ఇమ్మిగ్రేషన్ అండ్ కస్టమ్స్ ఎన్‌ఫోర్స్‌మెంట్ ఏజెంట్లు అదుపులోకి తీసుకున్నారు. ఆ చిన్నారిని ఎరగా వాడుకుని ఇంట్లోని ఇతరులను పట్టుకునేందుకు ప్రయత్నించారని స్కూల్ అధికారులు ఆరోపిస్తున్నారు.

అసలేం జరిగిందంటే..?

మంగళవారం మధ్యాహ్నం లియామ్ తన తండ్రితో కలిసి స్కూల్ నుంచి ఇంటికి రాగానే.. వారి డ్రైవ్‌వేలో మాస్క్ ధరించిన ఏజెంట్లు చుట్టుముట్టారు. బాలుడిని కారులో నుంచి దించి.. ఇంట్లో ఎవరెవరు ఉన్నారో తెలుసుకునేందుకు అతనితోనే తలుపు కొట్టించారని స్కూల్ సూపరింటెండెంట్ జెనా స్టెన్విక్ వెల్లడించారు. "ఒక ఐదేళ్ల చిన్నారిని ఎరగా వాడుకోవడం అత్యంత హేయమైన చర్య" అని ఆమె ఆగ్రహం వ్యక్తం చేశారు. ఆ సమయంలో అక్కడే ఉన్న మరో వ్యక్తి బాబును తన వద్ద వదిలి వెళ్లమని వేడుకున్నా.. అధికారులు వినకుండా బాలుడిని, తండ్రిని టెక్సాస్‌లోని డిటెన్షన్ సెంటర్‌కు తరలించారు.

అయితే ఈ ఆరోపణలను హోమ్ ల్యాండ్ సెక్యూరిటీ విభాగం తోసిపుచ్చింది. తాము చిన్నారిని లక్ష్యం చేసుకోలేదని.. అక్రమంగా దేశంలో ఉన్న అతని తండ్రి అడ్రియన్ అలెగ్జాండర్ కొనెజోను అరెస్ట్ చేసేందుకు వెళ్లామని తెలిపారు. ఏజెంట్లను చూడగానే తండ్రి పారిపోవడానికి ప్రయత్నించి బాబును అక్కడే వదిలేశాడని, అందుకే బాబు భద్రత దృష్ట్యా తమతో తీసుకెళ్లాల్సి వచ్చిందని అధికారులు వాదిస్తున్నారు.

లియామ్ కుటుంబ నేపథ్యమిదీ..

రామోస్ కుటుంబం 2024లో అమెరికాకు వచ్చిందని.. ప్రస్తుతం వారి 'అసైలమ్' కేసు విచారణలో ఉందని వారి తరపు న్యాయవాది మార్క్ ప్రోకోష్ తెలిపారు. "వారేమీ నేరస్తులు కాదు, ప్రభుత్వం అడిగిన ప్రతి నియమాన్ని పాటిస్తున్నారు. ఐదేళ్ల పిల్లాడిని నేరస్తుడిలా చూడటం అమానుషం" అని ఆయన ఆవేదన వ్యక్తం చేశారు. ప్రస్తుతం లియామ్, అతని తండ్రి టెక్సాస్‌లోని ఒక ఫ్యామిలీ హోల్డింగ్ సెల్‌లో ఉన్నట్లు సమాచారం.

ఈ ఘటనతో కొలంబియా హైట్స్ స్కూల్ డిస్ట్రిక్ట్‌లో విద్యార్థులు, తల్లిదండ్రులు తీవ్ర భయాందోళనకు గురవుతున్నారు. గత రెండు వారాల్లో ఇదే స్కూల్‌కు చెందిన నలుగురు విద్యార్థులను ఐసీఈ అధికారులు అదుపులోకి తీసుకోవడం గమనార్హం కాగా.. తదుపరి కూడా అరెస్టులు కొనసాగుతాయేమోనని అంతా గజగజా వణికిపోతున్నారు. లియామ్ క్లాస్ టీచర్ ఎల్లా సుల్లివన్ మాట్లాడుతూ.. "లియామ్ ఎంతో చురుకైనవాడు. అందరితో ప్రేమగా ఉండేవాడు. ప్రస్తుతం అతడు బడికి రాక.. అతడు కూర్చునే సీటు ఖాళీగా ఉండడం చూస్తుంటే గుండె తరుక్కుపోతోంది" అని కన్నీరు పెట్టుకున్నారు.