శాండల్ వుడ్ వర్సెస్ బాలీవుడ్ ట్వీట్ల యుద్ధంపై సోనూసూద్ స్పందన

తన కొత్త చిత్రం 'రన్ వే 34' విడుదల కోసం ఎంతగానో ఎదురుచూస్తున్న బాలీవుడ్ స్టార్ హీరో అజయ్ దేవగణ్ ప్రస్తుతం టాక్ ఆఫ్ ది టౌన్ గా నిలిచిన విషయం తెలిసిందే. ఇకపై హిందీ జాతీయ భాష కానే కాదు అని ఒకానొక మూవీ ఈవెంట్ లో కన్నడ స్టార్ హీరో సుదీప్ చేసిన వ్యాఖ్యలపై అజయ్ దేవగణ్ చాలా ఘాటుగా స్పందించారు. హిందీ జాతీయ భాష కానప్పుడు మరి మీ మాతృభాషలోని సినిమాలను హిందీలో ఎందుకు డబ్ చేస్తున్నట్టు? అని సుదీప్ ను తీవ్రంగా విమర్శించారు. దీంతో నెట్టింట పెద్ద దుమారమే చెలరేగింది. కొంతమంది నెటిజన్లు సుదీప్ ను సపోర్ట్ చేస్తుంటే మరి కొంతమందేమో అజయ్ కు మద్దతునిస్తున్నారు. శాండల్ వుడ్ వర్సెస్ బాలీవుడ్ అన్నట్టు నెట్టింట రచ్చ జరుగుతుంటే ఇదే విషయంపై సోనూసూద్ తన స్పందనను తెలియచేశారు. హిందీ మాత్రమే నేషనల్ లాంగ్వేజ్ అంటే నేనొప్పుకోను. భారతదేశానికి ఒకే ఒక్క భాష అది ఎంటర్టైన్మెంట్ (వినోదం). మీరు ఏ చిత్రపరిశ్రమలో పని చేస్తున్నారు? ఏ భాష మూవీ చేస్తున్నారు?అన్నది ముఖ్యమే కాదు. మన ఏకైక లక్ష్యం ప్రేక్షకులను ఎంటర్టైన్ చెయ్యటమే. మన సినిమా ప్రేక్షకులకు నచ్చితే వారు ఏ భాష నటీనటులు అని కూడా చూడకుండా ఎంతగానో ఆదరిస్తారు, ప్రేమిస్తారు.... అంటూ సోనూసూద్ తనదైన శైలిలో ఎవరినీ నొప్పించకుండా, తానొవ్వకుండా సమాధానం చెప్పి రియల్ హీరో అని మరోసారి నిరూపించుకున్నారు. 

శాండల్ వుడ్ వర్సెస్ బాలీవుడ్  ట్వీట్ల యుద్ధనికి సుదీప్, అజయ్ లిద్దరు ఫుల్ స్టాప్ పెట్టినట్టుగా తెలుస్తోంది. అజయ్ ఇచ్చిన రీప్లై కి సుదీప్ 'అలా మాట్లాడటానికి గల కారణం వేరు. అసలు ఆ కాంటెక్స్టు వేరు. మీకు తప్పుగా అర్ధమైనందుకు సారీ. నాకు అన్ని భాషల మీద అమితమైన గౌరవం ఉంది. మనమందరం ఒకే ఇండస్ట్రీ కి చెందిన వాళ్ళం అది ఇండియన్ ఫిలిం ఇండస్ట్రీ'... అని రీట్వీట్ చేయగా... అందుకు అజయ్ కూడా సుదీప్ కు సారీ చెప్పి ఈ మాటల యుద్ధనికి తెరదించారు.