లాంగ్వేజ్ వార్ పై బాలీవుడ్ క్వీన్ షాకింగ్ కామెంట్స్

గత కొద్దిరోజులుగా సోషల్ మీడియాలో జాతీయభాషపై రచ్చ జరుగుతున్న సంగతి తెలిసిందే. దీనిపై సౌత్ వాళ్ళు, నార్త్ వాళ్ళు ట్వీట్ల యుద్ధం చేస్తున్నారు.ఇటీవల ఒక మూవీ ఫంక్షన్లో పాల్గొన్న శాండల్ వుడ్ స్టార్ హీరో కిచ్చా సుదీప్ కన్నడ పరిశ్రమను మెచ్చుకుంటూ, ఊరడిస్తూ చేసిన వ్యాఖ్యలను బాలీవుడ్ స్టార్ హీరో అజయ్ దేవగణ్ మరోలా అర్ధం చేసుకుని సుదీప్ పై సోషల్ మీడియాలో మాటల యుద్ధానికి దిగిన విషయం తెలిసిందే కదా. ఎంతోమంది నెటిజన్లు సుదీప్ కు సపోర్ట్ చేయగా, మరికొంతమంది అజయ్ కు సపోర్ట్ గా నిలిచారు. ఇకపై హిందీ జాతీయ భాష కానే కాదు అని తాను పాల్గొన్న మూవీ ఫంక్షన్ కాంటెక్స్టుకు తగ్గట్టుగా సుదీప్ మాట్లాడారు. ఇది సహించని అజయ్ హిందీ జాతీయ భాష కానప్పుడు మీ మాతృభాషలో సినిమాలను హిందీలోకెందుకు డబ్ చేస్తున్నట్టు? అని ఫైర్ అయ్యాడు. దీంతో సోషల్ మీడియాలో చిన్న పాటి యుద్ధమే జరిగింది. ఆ తర్వాత సుదీప్ క్లారిటీ ఇవ్వటం, అజయ్ సారీ చెప్పటం, మాటల యుద్ధానికి తెర దించటం... అన్ని జరిగిపోయాయి. 

అయితే ఈ వివాదంపై బాలీవుడ్ క్వీన్ తనదైన రీతిలో వ్యాఖ్యలు చేసింది. ఆమె నటించిన లేడీ ఓరియెంటెడ్ చిత్రం ధాకడ్ ట్రైలర్ లాంఛ్ ఈవెంట్ నిన్న ముంబైలో ఘనంగా జరిగింది. ఈ వేడుకలో పాల్గొన్న కంగనా సోషల్ మీడియాలో జరుగుతున్న లాంగ్వేజ్ వార్ పై తన గళాన్ని వినిపించింది. హిందీ, తెలుగు, తమిళం, కన్నడ, మలయాళం లాంటి నార్త్ ,సౌత్ భాషల కన్నా దేవభాష సంస్కృతాన్ని జాతీయభాషగా చెయ్యటం చాలా ఉత్తమమనీ, భారతీయ భాషలన్నీ కూడా సంస్కృతం నుండే వచ్చాయని, సంస్కృతం కన్నా గొప్ప భాష వేరే ఏది లేదని కంగనా అభిప్రాయపడింది.  ఒకపక్క జాతీయ భాష హిందీ మీద భిన్నాభిప్రాయాలు వ్యక్తమవుతుంటే, సంస్కృతం జాతీయభాషగా ఉండాలన్న కంగనా వ్యాఖ్యలు వైరల్ గా మారాయి. దీనిపై ఎవరెలా స్పందిస్తారో చూడాలి.