‘లవర్’ టాక్.. రొటీన్ ప్రేమకథే కానీ

రొటీన్ కథలతో విసిగిపోయిన తెలుగు ప్రేక్షకులు కొత్తదనం కోరుకుంటున్నారు. ప్రయోగాలు చేసే దర్శకులను, హీరోలను ప్రోత్సహిస్తున్నారు. అందుకే కొత్తగా ఇండస్ట్రీకి వచ్చే దర్శకులు ఇప్పటి వరకు తెలుగు తెరపై కనిపించని వినూత్నమైన కథలను ఎంచుకుంటున్నారు. వాటిని అంతే అందంగా తెరపై ఆవిష్కరిస్తున్నారు. ‘పెళ్లిచూపులు’, ‘శతమానం భవతి’, ‘అర్జున్‌రెడ్డి’, ‘ఘాజీ’, ‘నిన్నుకోరి’, ‘ఆర్ఎక్స్100’ వంటి సినిమాలు ఈ కోవకు చెందినవే. ఇలాంటి వైవిధ్యమైన చిత్రాలు ఎన్ని వచ్చినా రొటీన్ కథలతో మూసకొట్టుడు ధోరణిలో ఇంకా సినిమాలు వస్తూనే ఉన్నాయి. అలాంటి సినిమాలు ప్రేక్షకుల ఆదరణకు నోచుకోక బాక్సాఫీసు వద్ద చతికిల పడుతున్నాయి. 

టాలీవుడ్‌లో విజయవంతమైన నిర్మాతగా పేరొందిన దిల్ రాజు ఎన్నో వైవిధ్యమైన చిత్రాలను తెలుగు ప్రేక్షకులకు అందించారు. ఎంతో మంది కొత్త దర్శకులను పరిచయం చేశారు. ఆయన బ్యానర్‌లో సినిమా వస్తుందంటే అంచనాలు భారీగానే ఉంటాయి. తాజాగా ఆయన నిర్మించిన చిత్రం ‘లవర్’. ‘అలా ఎలా’ సినిమా ద్వారా దర్శకుడిగా పరిచయమైన అనీష్ కృష్ణ ఈ చిత్రానికి దర్శకుడు. వరస ఫ్లాపులతో సతమతమవుతోన్న యంగ్ హీరో రాజ్ తరుణ్ హీరో. రిద్ది కుమార్ హీరోయిన్‌గా పరిచయమవుతోంది. ‘అలా ఎలా’ లాంటి అందమైన సినిమాను తెరకెక్కించిన దర్శకుడు కావడం, దిల్ రాజు నిర్మించడంతో ‘లవర్’పై సాధారణంగానే అంచనాలు ఏర్పడ్డాయి. శుక్రవారం ప్రేక్షకుల ముందుకు వచ్చిన ఈ సినిమాపై మిశ్రమ స్పందన వినబడుతోంది. 

సినిమా మామూలుగానే ఉందని, కొత్తదనం ఏమీ లేదని ట్విట్టర్ ద్వారా కొంత మంది స్పందిస్తున్నారు. అయితే రాజ్ తరుణ్ గత చిత్రాలతో పోలిస్తే మాత్రం బాగానే ఉందని అంటున్నారు. ఫస్ట్ హాఫ్‌ను కామెడీతో బాగానే నడిపించినా.. సెకండ్ హాఫ్‌లో మాత్రం విసిగించారని సినిమా చూసిన ప్రేక్షకుల మాట. కొంత మంది అయితే సినిమా అస్సలు బాగాలేదని కొట్టిపారేస్తున్నారు. మరికొందరు ఫర్వాలేదు చూడొచ్చు అంటున్నారు. ఏదేమైనా ఈ ‘లవర్’ పెద్దగా ఆకట్టుకోలేకపోయాడనే చెప్పాలి.