మిల్కీ బ్యూటీ కొత్త మిషన్

ఐటెమ్ నంబర్లతో కిక్కెక్కించడం మిల్కీ బ్యూటీ తమన్నాకు ఇప్పుడే కొత్తేం కాదు. ఇదివరకూ తెలుగు - తమిళ్ లో పలు ఐటెమ్ నంబర్లలో ఆడిపాడింది. అప్పట్లో బెల్లంకొండ `అల్లుడు శీను`లో - ఆ తర్వాత ఎన్టీఆర్ `జనతా గ్యారేజ్`లో అదిరిపోయే ఐటెమ్ నంబర్లతో దుమ్ము దులిపేసింది. వీటికి పారితోషికం అంతే భారీగా ముట్టజెప్పారు అమ్మడికి. ప్రస్తుతం మిల్కీ కెరీర్ పరంగా మునుపటితో పోలిస్తే నెమ్మదించిందనే చెప్పాలి. అడపాదడపా అవకాశాలొస్తున్నాయి తప్ప పూర్తి స్థాయిలో భారీ అవకాశాలేం రావడం లేదు. హిందీలో ఓ రెండు సినిమాలు అంగీకరించినా అవి అంతకంతకు ఆలస్యమవుతూనే ఉన్నాయి. తెలుగులో క్వీన్ రీమేక్ `దటీజ్ మహాలక్ష్మి`లో టైటిల్ పాత్ర పోషిస్తోంది. మెగాస్టార్ `సైరా నరసింహారెడ్డి` - విక్టరీ వెంకటేష్- వరుణ్ తేజ్ ల  `ఎఫ్2`లో ఈ భామ నటిస్తోంది.

ఆ క్రమంలోనే తమన్నా కన్నడ పరిశ్రమపైనా దృష్టి సారించింది. అక్కడ అదిరిపోయే ప్యాకేజీని ఆఫర్ చేస్తే నటించేందుకు సిద్ధమవుతోంది. తాజాగా కన్నడ యువహీరో యశ్ కథానాయకుడిగా నటిస్తున్న భారీ బడ్జెట్ చిత్రం కెజిఎఫ్ లో ఓ ఐటెమ్ నంబర్ లో నర్తించే అవకాశం తమన్నా అందుకుంది. వచ్చే వారం ఈ పాటను తెరకెక్కించనున్నారు. ప్రశాంత్ నీల్ దర్శకత్వం వహిస్తున్న ఈ చిత్రాన్ని హోంబేల్ పిలింస్ సంస్థ నిర్మిస్తోంది. ఈ చిత్రాన్ని కన్నడతో పాటు తెలుగు - తమిళ్ - మలయాళం - హిందీలోనూ రిలీజ్ చేయనున్నారు. 2016లో జాగ్వార్ సినిమాలో ఐటెమ్ నంబర్ లో నర్తించిన తమన్నా ఇప్పుడు రెండోసారి కన్నడిగుల సినిమాలో ఐటెమ్ నంబర్ చేసేందుకు సంతకం చేసింది.

జాగ్వార్ హీరో నిఖిల్ గౌడ మాజీ ప్రధాని దేవెగౌడ మనవడు - ముఖ్యమంత్రి కుమార స్వామి తనయుడు అన్న సంగతి తెలిసిందే. యశ్ .. హీరో నిఖిల్ గౌడకు క్లోజ్ ఫ్రెండ్. బంధుత్వం ఉంది. అంటే మిల్కీ బ్యూటీకి వచ్చిన ఆఫర్ ఆ రేంజులో ఉందన్నమాట! ఈ ఐటెమ్ నంబర్ కు మినిమం కోటి వరకూ ఆఫర్ చేశారన్న మాటా వినిపిస్తోంది.