ఐదు భాష‌ల్లో కె జి ఎఫ్ ట్రైల‌ర్ రిలీజ్

యష్‌ కథానాయకుడిగా ప్రశాంత్‌ నీల్‌ దర్శకత్వంలో ఐదు భాషల్లో రూపొందుతున్న చిత్రం కేజీఎఫ్‌ (కోలార్‌ గోల్డ్‌ ఫీల్డ్స్‌). కైకాల సత్యనారాయణ సమర్పణలో హోంబలే ఫిల్మ్స్‌ పతాకంపై విజయ్‌ కిరగందూర్‌ నిర్మిస్తున్న ఈ చిత్రాన్ని తెలుగులో వారాహి చలనచిత్ర పతాకంపై సాయి కొర్రపాటి విడుదల చేయనున్నారు. కాగా ఈ చిత్రం కన్నడ, తెలుగు, తమిళ, మలయాళ, హిందీ భాషలకు చెందిన ట్రైలర్‌ను శుక్రవారం బెంగళూర్‌లో జరిగిన కార్యక్రమంలో విడుదలచేశారు. డిసెంబర్‌ 21న ఈ చిత్రాన్ని ప్రేక్షకుల ముందుకు తీసుకుని రానున్నారు.

ముఖ్యఅతిథిగా విచ్చేసిన సీనియర్‌ నటుడు అంబరీష్‌ చేతులమీదుగా కన్నడ ట్రైలర్‌ విడుదలైంది. కన్నడ సినిమా స్థాయిని ఇండియన్‌ సినిమా స్థాయికి పెంచేలా ఈ చిత్రం ట్రైలర్‌ ఉందని, చిత్రబృందానికి అంతటికీ శుభాభినందనలు తెలియజేస్తున్నానని అంబరీష్‌ పేర్కొనగా, తెలుగు ట్రైలర్‌ను విడుదల చేసిన సాయి కొర్రపాటి మాట్లాడుతూ, నేను బళ్లారి నుంచి హైదరాబాద్‌కు వెళ్లి నిర్మాతగా మారాను. నేను ఎప్పట్నుంచో ఒక కన్నడ సినిమా చేయాలనుకుంటున్నాను. మా బేనర్‌పై ఈ చిత్రాన్ని విడుదల చేయబోతుండటం ఆనందంగా ఉంది అన్నారు. తమిళ ట్రైలర్‌ను విడుదలచేసిన హీరో విశాల్‌ మాట్లాడుతూ, ఈ చిత్ర హీరో యష్‌తో నాకు చాలాకాలంగా మంచి అనుబంధం ఉంది. భాషా పరమైన సరిహద్దులను ఈ సినిమా చెరిపేస్తుంది. 

బాహుబలితో ఇప్పటికే ఈ విషయం నిరూపితమైంది. ఇప్పుడు ఈ సినిమాతో మరోసారి రుజువు కాబోతోంది అని అన్నారు. హిందీ ట్రైలర్‌ను విడుదలచేసిన ఏఏ ఫిల్మ్స్‌ అధినేత అనిల్‌ తాండన్‌ మాట్లాడుతూ, బాహుబలి, రోబో తర్వాత తాను విడుదల చేయబోతున్న మరో చక్కటి చిత్రమిదని అన్నారు. దర్శకుడు ప్రశాంత్‌ నీల్‌ మాట్లాడుతూ, నాలుగేళ్ల ప్రయాణం ఈ సినిమా. మొదట కన్నడంలోనే విడుదల చేద్దామని అనుకున్నాం. కానీ నిర్మాత ఈ సినిమా చూశాక ఐదు భాషల్లో విడుదల చేయాలనుకున్నారు అని అన్నారు. నిర్మాత విజయ్‌ కిరగందూర్‌ మాట్లాడుతూ, అందరూ ఈ సినిమా బడ్జెట్‌ ఎంత అని అడుగుతున్నారు. నాకు డబ్బు ముఖ్యం కాదు. బంధాలే ముఖ్యం.

నేను చేసే సినిమా పరిశ్రమలో చరిత్ర సృష్టించాలి. కొత్త టాలెంట్‌ బయటకు రావాలనే ఆలోచనతోనే ముందుకు సాగుతుంటాను. యస్‌ నాకు తమ్ముడు లాంటి వాడు అని అన్నారు. హీరో యష్‌ మాట్లాడుతూ, నా తొలి సినిమా రామాచారి కంటే ఈ సినిమా ముందే పూర్తి కావాల్సింది. మంచి అవుట్‌పుట్‌ కోసం చాలా కష్టపడ్డాం. రాబోయే రోజుల్లో ప్రశాంత్‌ పేరు ఇండియన్‌ సినిమాలో గుర్తుండిపోతుంది. ఇలాంటి కథను నిర్మాత ఎక్కడా రాజీపడకుండా మాపై నమ్మకంతో ఎంతో ఓపికగా పూర్తిచేశారు అని అన్నారు. ఇంకా ఈ కార్యక్రమంలో పలువురు ప్రముఖులు, ఇతర చిత్రబృందం పాల్గొన్నారు.