సినిమాల బీజీలో రచ్చ రవి

వెంకీ-వరుణ్ తేజ్-తమన్నా-మెహెరీన్ హీరోహీరోయిన్స్ గా అనిల్ రావిపూడి దర్శకత్వంలో దిల్ రాజు నిర్మించిన 'ఎఫ్-2' వసూళ్ల వర్షం కురిపిస్తోంది. ఇప్పటికే రూ.50 కోట్ల క్లబ్బులో చేరిన ఈ చిత్రం రూ.100 కోట్ల క్లబ్బులో స్థానం కోసం పరుగులు తీస్తోంది. ఇంత పెద్ద హిట్ లో తనకు కూడా రవ్వంత భాగం దక్కడం సంతోషంగానూ, గర్వంగానూ ఉందని రచ్చ రవి అంటున్నారు. విక్టరీ వెంకటేష్, మెగా ప్రిన్స్ వరుణ్ తేజ్ లతో కలిసి నటించే అవకాశాన్ని ఇచ్చిన దర్శకుడు అనిల్ రావిపూడి, నిర్మాత దిల్ రాజు, శిరీష్, లక్ష్మణ్ లకు ఎప్పటికీ రుణపడి ఉంటానని రవి తెలిపారు. అనిల్ రావిపూడి దర్శకత్వంలో ఇంతకు ముందు 'రాజా ది గ్రేట్'లోనూ నటించానని, దిల్ రాజు గారి బ్యానర్ లో 'ఎం.సి.ఏ' కూడా చేశానని, ఆ రెండూ కూడా హిట్లేనని రవి పేర్కొన్నారు.
'జబర్దస్త్' ప్రోగ్రామ్ తో 'రచ్చ రవి'గా మారిన వరంగల్ కు చెందిన 'రవికుమార్ దొడ్డిపాటి' గత పదిహేనేళ్లుగా పరిశ్రమలో పడరాని పాట్లన్నీ పడి.. మెల్లగా తనకంటూ ఒక ప్రత్యేకమైన పేరు సంపాదించుకొని..  ఇప్పటికి సుమారుగా 50 సినిమాల్లో నటించాడు. తేజ '1000 అబద్ధాలు' రవి పరిచయ చిత్రం కాగా 'ఖైదీ నంబర్ 150, శతమానం భవతి, నేనే రాజు నేనే మంత్రి' వంటి సూపర్ హిట్ చిత్రాల్లో నటించారు. అంతకు ముందు రవి ఆర్జేగా దుబాయిలో పని చేశాడు. 'నవ్వుల నల్లబాలు'గా ఇప్పటికీ రవి అక్కడి వారికి సుపరిచితుడే. తాను ఎక్కడుంటే అక్కడ తనదైన మాటల చమత్కారంతో కడుపుబ్బ నవ్వించే రవికి సరైన క్యారక్టర్ పడితే ఏ రేంజ్ లో రచ్చ చేస్తాడో చెప్పాల్సిన పని లేదు. ప్రస్తుతం పోసాని దర్శకత్వంలో ఒక సినిమా, శివాజీ రాజా తనయుడు హీరోగా పరిచయమవుతున్న 'ఏదైనా జరగొచ్చు'తోపాటు.. రెజీనా హీరోయిన్ గా నటిస్తున్న ఇంకా పేరు పెట్టని సినిమాలోనూ నటిస్తున్నాడు!!