తొలి మహిళా డాక్టర్ బయోపిక్ ర‌డీ.

మన దేశంలో బయోపిక్‌ల హవా నడుస్తోంది. అటు బాలీవుడ్ ఇటు టాలీవుడ్‌లో వరుసగా సినీ రాజకీయ ప్రముఖులతో పాటు సామాన్యులుగా జన్మించి అసామాన్య విజయం సాధించిన వారి జీవితాలు కూడా దృశ్యకావ్యలుగా రూపుదాల్చుతున్నాయి. వాటిలో ఒకటి భారతీయ తొలి మహిళా డాక్టర్ ఆనంది గోపాల్ జోషి బయోపిక్. ఆనంది మనదేశ తొలి మహిళా డాక్టర్. భావోద్వేగాలతో కూడిన  ఆమె జీవితం ఆధారంగా ఆనందీ గోపాల్ అనే పేరుతో మరాఠీ భాషలో బయోపిక్ రూపొందింది. ఈ చిత్రం ఫిబ్రవరి 15 న విడుదల కాబోతుంది. సమీర్ విద్వాన్స్ రూపొందిన ఈ మూవీలో ఆనంది పాత్రలో భాగ్యశ్రీ మిలింద్ నటిస్తుండగా ఆమె భర్త గోపాల్ పాత్రలో లలిత్ ప్రభాకర్ నటిస్తున్నారు.

అమెరికా వెళ్లి.. డాక్టరైన ఏడాదికే..
ఆనంది గోపాల్ 31 మార్చ్ 1865 లో మహారాష్ట్రలోని పూణే నగరంలో జన్మించారు. ఆమెకు గోపాల్ రావు జోషితో బాల్య వివాహం జరిగింది. మహిళా అక్షరాస్యత ప్రాముఖ్యత గురించి తెలుసుకున్న ఆనంది చదువుపైన ఆసక్తి పెంచుకున్నారు. అందుకు ఆమె భర్త కూడా సహకరిస్తారు. అప్పట్లో డాక్టర్లు అందరూ పురుషులే ఉండడం వలన మహిళలు వారి ఆరోగ్య సమస్యలు చెప్పుకోవడానికి ఇబ్బంది పడేవారు. ఈ సమస్యను అధిగమించడానికి ఆనంది మెడిసిన్ చదువాలని నిశ్చయించుకొని అమెరికా వెళ్లారు. అక్కడ ఉమెన్స్ మెడికల్ కాలేజీ ఆఫ్ పేసిల్‌వానియా విద్యా సంస్థ నుంచి మెడిసిన్‌లో పట్టాపొందారు. కానీ దురదుష్టవశాత్తు ఆమె తక్కువ వయసులోనే కన్నుమూశారు. ఆనంది 26 ఫిబ్రవరి 1887 న ఆమె 21 వ ఏటా మృతిచెందారు. ఆమె మరణించి శతాబ్దం అవుతున్నా.. భారతీయ తొలి మహిళా డాక్టర్‌గా గుర్తుండిపోయారు. చదువుకోవాలనుకున్న ఎందరో అమ్మాయిలకు ఆదర్శంగా నిలిచారు.