అక్కడనే హిట్టు లేదు మరి ఇక్కడ....

వేరే భాషలకు చెందిన కొన్ని సినిమాల్ని ఎందుకు అనువాదం చేస్తారో.. ఏం లాభం ఉంటుందని రిలీజ్ చేస్తారో అర్థం కాదు. తమిళ కథానాయకుడు సిద్దార్థ్ నటించిన ‘కావ్య తలైవన్’ అనే సినిమా పరిస్థితి ఇలాగే ఉంది. తమిళంలో డిజాస్టర్ అయిన ఈ చిత్రాన్ని తెలుగులో ‘ప్రేమాలయం’ పేరుతో విడుదల చేయడానికి సన్నాహాలు జరుగుతున్నాయి. ఈ సినిమాకు తమిళంలో ఎలాంటి పరాభవం ఎదురైందో.. ప్రస్తుతం తెలుగులో సిద్ధు మార్కెట్ ఎలా ఉందో తెలిస్తే.. దీన్ని ఇక్కడ రిలీజ్ చేయడం కామెడీగా అనిపిస్తుంది.

శంకర్ శిష్యుడు వసంత బాలన్ డైరెక్ట్ చేసిన సినిమా ‘కావ్య తలైవన్’. సిద్ధు కెరీర్లోనే అత్యధికంగా.. దాదాపు 40 కోట్ల బడ్జెట్లో ఈ చిత్రాన్ని తెరకెక్కించారు. ఐతే మంచి సినిమాగా పేరు తెచ్చుకున్నప్పటికీ.. దీనికి బాక్సాఫీస్ దగ్గర దారుణమైన ఫలితం ఎదురైంది. రిలీజ్ రోజే థియేటర్లు వెలవెలబోయాయి. దీని గురించి ‘తమిళ్ పడం-2’లో దారుణమైన జోకులు పేల్చారు. ఆ సెటైరికల్ మూవీలో విలన్ని పట్టుకోవడానికి హీరో ఒక ఐడియా వేస్తాడు. ఒక థియేటర్ యజమానికి ఫోన్ చేసి థియేటర్ నుంచి జనాల్ని బయటికి వదలమంటాడు. ఆ జనాల సందడిలో విలన్ ముందుకు సాగలేక తనకు దొరికిపోతాడన్నది అతడి ప్లాన్. ఐతే ఆ ప్లాన్ వర్కవుట్ కాదు. ఎందుకంటే.. ఆ థియేటర్లో ఆడుతున్నది ‘కావ్యతలైవన్’ అని తెలుస్తుంది. ఆ సినిమా చూడ్డానికి ఒకే ఒక్క ప్రేక్షకుడు వచ్చి ఉంటాడు.

ఈ రేంజిలో కామెడీ చేశారంటే ‘కావ్య తలైవన్’ ఎంత పెద్ద డిజాస్టరో అర్థం చేసుకోవచ్చు. ఇలాంటి సినిమాను తెలుగులోకి తెస్తారట. ఒకప్పుడు తెలుగులో సిద్ధుకు మంచి క్రేజ్ ఉండేది. ఇక్కడే సినిమాలు చేసుకునేవాడు. కానీ వరుస ఫ్లాపులతో అతడి అడ్రస్ గల్లంతయింది. అతడి డబ్బింగ్ సినిమాలు కూడా జనాలు పట్టించుకునే పరిస్థితి లేదు. మరి ఐదేళ్ల కిందట వచ్చిన సిద్ధు డిజాస్టర్ మూవీని ఇప్పుడు తెలుగులో రిలీజ్ చేయడం ఎందుకో?