అల్లు అర్జున్ ఈ సారి చూసుకొని రావయ్యా

రెండు నెలల కిందట ‘పడి పడి లేచె మనసు’ ప్రి రిలీజ్ ఈవెంట్‌కు ముఖ్య అతిథిగా వచ్చిన అల్లు అర్జున్.. తనను అందరూ లక్కీ మస్కట్ అనడం గురించి మాట్లాడాడు. తాను ఆడియో, ప్రి రిలీజ్ ఈవెంట్లకు వస్తే ఆ సినిమా హిట్టవుతుందని అంటున్నారని.. అలాంటపుడు తన సినిమాలన్నీ ఆడేయాలి కదా అంటూ చమత్కరించాడు. కానీ ఏ ముహూర్తాన బన్నీ ఈ లక్కీ మస్కట్ కాన్సెప్ట్ ఎత్తాడో కానీ.. అప్పుడే సెంటిమెంటు తిరగబడింది.

‘పడి పడి లేచె మనసు’ డిజాస్టర్ అయింది. ఐతే ఎప్పుడో ఒకసారి ఇలాంటి ఒక ఎదురు దెబ్బ తగలడం మామూలే అనుకోవచ్చు. కానీ బన్నీ అతిథిగా వచ్చిన తర్వాతి సినిమాకు మరింత దారుణమైన ఫలితం వచ్చింది. కొన్ని రోజుల కిందటే మలయాళ డబ్బింగ్ సినిమా ‘లవర్స్ డే’ ప్రి రిలీజ్ ఈవెంట్‌కు వచ్చి బన్నీ సందడి చేసిన సంగతి తెలిసిందే. ఈ చిత్రం ఈ గురువారమే విడుదలై డిజాస్టర్ అయింది.

ఐతే సినిమా ఫెయిలైతే ఓకే అనుకోవచ్చు. ఇది మరీ చెత్త సినిమా కావడంతోనే వచ్చింది సమస్య. మరీ బి-గ్రేడ్ సినిమాలా ఉంది ‘లవర్స్ డే’. మలయాళ సినిమా అంటే ఎంతో కొంత విషయం ఉంటుందని అనుకున్న ప్రేక్షకులకు దిమ్మదిరిగింది. మలయాళంలో తనకు మంచి ఫాలోయింగ్ ఉన్న నేపథ్యంలో అక్కడి నుంచి వచ్చిన సినిమా కావడం.. వింక్ వీడియోతో పాపులారిటీ సంపాదించుకున్న ప్రియ ప్రకాష్ వారియర్ నటించిన చిత్రం కావడంతో బన్నీ టెంప్ట్ అయి ఈ వేడుకకు వచ్చాడు.

ఈ సినిమాకు తెలుగులో పబ్లిసిటీ వచ్చిందంటే అందుకు బన్నీనే కారణం. జనాలు థియేటర్లకు రావడంలో ప్రియ పాత్ర ఎంతో.. బన్నీ పాత్ర అంత ఉంది. ఐతే ఇప్పుడు సినిమా దారుణంగా ఉండటంతో బన్నీ తెచ్చిన పబ్లిసిటీ అంతా వృథా అయింది. జనాలు కొద్దిగా బన్నీని కూడా తిట్టుకుంటున్నారు. బన్నీ ఫ్యాన్స్ అయితే.. ఇలాంటి సినిమాల్ని ప్రమోట్ చేసి ఎందుకు చెడ్డ పేరు తెచ్చుకోవడం అంటున్నారు. సినిమా గురించి కొంచెం తెలుసుకుని ఈవెంట్లకు రావాలని సూచిస్తున్నారు.