పాజిటివ్‌ రివ్యూలే ఈ చిత్ర విజయానికి కారణం
cinema | Suryaa Desk | Published : Mon, Feb 12, 2024, 11:18 AM
తాను వివాదాలను సృష్టించడం కోసం సినిమాల్లో నటించడం లేదని, కేవలం ప్రేక్షకులను నవ్వించడం కోసమే నటిస్తున్నానని హీరో సంతానం అన్నారు. కార్తీక్‌ యోగి దర్శకత్వంలో సంతానం, మేఘాఆకాష్‌ జంటగా నటించిన చిత్రం ‘వడక్కుపట్టి రామస్వామి’. నిళల్‌గల్‌ రవి, ఎంఎస్‌ భాస్కర్‌, తమిళ్‌, మారన్‌, రాజేంద్రన్‌, జాన్‌విజయ్‌, రవిమారియా, కూల్‌ సురేష్‌ తదితరులు ఇతర పాత్రల్లో నటించారు. ఈనెల 2న విడుదలైన ఈ చిత్రం సూపర్‌డూపర్‌ హిట్‌ సాధించింది. దీన్ని పురస్కరించుకుని చెన్నైలో సక్సెస్‌ మీట్‌ను చిత్ర బృందం నిర్వహించింది. ఈ కార్యక్రమంలో హీరో సంతానం మాట్లాడుతూ... మీడియా ఇచ్చిన పాజిటివ్‌ రివ్యూలే ఈ చిత్ర ఘన విజయానికి కారణం. ప్రేక్షకులను నవ్వించడమే నా వృత్తి. ఈ సినిమా విడుదలకు ముందు టైటిల్‌ విషయంలో వివాదం చెలరేగింది. విడుదలైన తర్వాత థియేటర్‌కు వెళ్లిన ప్రతి ప్రేక్షకుడు కడుపుబ్బ నవ్వుకున్నారు. నాకు దేవుడి భక్తి ఎక్కువ. ఎవరి నమ్మకాలు వారివి. మూఢ నమ్మకంతో పాటు దైవభక్తిని కలగలిపి ఈ చిత్రాన్ని దర్శకుడు తెరకెక్కించారని అన్నారు. దర్శకుడు కార్తీక్‌ యోగి మాట్లాడుతూ... ‘ఈ చిత్ర విజయానికి ప్రధాన కారణం మీడియానే. మీతో పాటు చిత్రాన్ని ఘన విజయం చేసిన ప్రేక్షక దేవుళ్లకు ధన్యవాదాలు. ఈ సినిమా కోసం ఎంతో శ్రమించిన ప్రతి ఒక్కరికీ కృతజ్ఞతలు. బడ్జెట్‌కు వెనుకాడకుండా, క్వాలిటీలో రాజీపడకుండా చిత్రాన్ని తెరకెక్కించిన నిర్మాతకు కృతజ్ఞతలు’ అని పేర్కొన్నారు.
|
|